Zer harreman dute gazteek euskararekin? Nola erakarri euskarara? Nola prestigiatu euskara?

Une honetan kezka handia pizten duen gaia da, eta horren inguruan gogoeta egiteko Igo bolumena! Euskara. Kultura. Transmisioa. Ertzetatik jardunaldia antolatu dute abenduaren 2rako Barakaldon. Izen ematea zabalik da azaroaren 26ra arte.

Helburua da hirigunetako gazteen artean euskararen eta euskarazko kulturaren transmisioa bultzatzea. Horretarako, euskararen erdigunetik urrun egon daitezkeen eremuetako gazteen inguruan hasunarketa egitea da asmoa.

Ahize-AEK aholkularitza zerbitzuak antolatu du jardunaldia hainbat erakunderen babesarekin. Hala nola, Barakaldoko Udalaren, Bizkaiko Foru Aldundiaren eta Eusko Jaurlaritzako Hizkuntza Politika sailaren babesa jaso du.

Jardunaldian aztertuko diren gaien artean daude periferia zer den definitzea, hezkuntza sistemaren erronkak non dauden kokatzea, zein ikasleen kultura eta hizkuntza identitateak ze bilakaera izan duen aztertzea.

Mapa soziolinguistikoak diona

Mapa soziolinguistikoko datuak argiak dira. 1986an 5-24 urte arteko biztanleriaren %10,5a zen euskalduna, eta 2016an %76,5. Hala, 66 puntu egin ditu gora ezagutzak.

Euskararen erabilerak, aldiz, ez du aurrera egiten. 2016an Bilbo Handian egindako kale erabileraren neurketak dio 2-14 urte artekoen %4,5ak erabiltzen zuela euskara Bilbon, eta 15-24 artekoen %2,6ak. 2011eko neurketarekin alderatuz gero, bi adin tarteetan ia bi puntu egin zuen behera erabilerak.

Errealitate horrek bultzatu zuen Naroa Jauregizuria ikerketa egitera. Bilbo Handiko lau ikastetxetako ikasleekin egindako lanketatik baieztatu ahal izan zuen euskarazko kulturaren transmisioan etena dagoela haurtzarotik gaztarorako saltoa egiten denean.

Ikerketa hori oinarri hartuta egingo da, besteak beste, Igo bolumena! jardunaldia.

Azaroaren 26ra arte egongo da zabalik jardunaldian izena emateko aukera hemen.

Bestetik, Igo bolumena jardunaldiak badu bloga.

Unitate didaktikoa

Gaiarekin lotutako unitate didaktikoa ere aurkeztuko du Ahize-AEK aholkularitza zerbitzuak-ek jardunaldian. #damolat du izena eta Ikastolen Elkartea ari da diseinu lanak egiten. Kultura transmisioan eragiteko materiala da.

Doan jarriko dute eskuragarri gazteen artean euskarazko kultura sustatzen diharduten eragileei. Bizkaiko Foru Aldundiak diruz lagundutako proiektua da.