Koronabirusaren hedapena saihesteko asmoz, EAEko ikastetxe guztietan irakaskuntza jarduna eten egin dute eta kirol eta kultura ekintzak bertan behera geratzen ari dira; horrez gain, herri askotan udal instalazio gehienak itxi egin dituzte.

Eusko Jaurlaritzak atzo bertan hartutako erabakia da. Euskal Autonomia Erkidegoko ikastetxe guztien eskola-jarduera presentziala aldi baterako etengo dute, koronabirusa dela eta. Etenaldi horrek gutxienez hamabost egun iraungo ditu, gaurtik aurrera. “Ondorioz, bertan behera geratzen da Arabako, Bizkaiko eta Gipuzkoako hiru lurralde historikoetako ikastetxeetan aurrez aurreko eskola-jarduera guztia, baita Haurreskolak Partzuergoaren mendeko haur eskoletan ere”, dio Jaurlaritzaren zirkularrak.

Era berean, ikasleekin edo irakasleekin egiten diren mota guztietako irteerei dagokienez, Osasun Sailaren jarraibideak bete behar direla ohartarazi du Jaurlaritzaren zirkularrak. “Une honetan horiek saihestea gomendatzen du sail horrek”.

Nafarroan eta Ipar Euskal Herrian astelehenetik aurrera hartuko dute neurri berdina. Nafarroako lehendakari Maria Txibitek atzo iragarri zuen Nafarroako Gobernuak hartutako neurria. Frantziako presidente Emmanuel Macronek ere atzo egin zuen agerraldi publikoa.

Argazkiaren iturria: Goiena.eus