Jakin-mina da, aditu askoren esanetan, ikasketa prozesuetako gako oinarrizkoenetako bat. Prakagorri elkarteko zuzendari Gorka Aurre ere iritzi berekoa da. Jakin-minarekin batera goi-mailako irakurketa eta metodologia eraginkorrak aipatzen ditu.

Gaurko honetan jakin-minaren inguruan aipatzen dituenetan zentratuko gara.

“Zoritxarrez, gaur egungo gazte gehienen heziketa jakin-minaren eraginez baino buruz gauzak ikasteko ekinez gauzatzen da, eta emaitzak eta etekin bikainak lortzetik urrun izaten dira. Iristen dira gauzak gainditzera baina ez bikaintasunaren mailan egotera”, azaltzen du.

“Ikasleei lehenbailehen xiringatu behar zaie jakin-mina”, azaltzen du Goiena Telebistari egindako adierazpenetan. “Zergatik? Jakin-mina ezinbestekoa delako jakintza maila jasoetara heltzeko. Jakin-mina da bidea beste gaitasunak garatzeko eta jakintza ugaritzeko”.

Ikasle guztiek dute gaitasuna

Aurrek azpimarratzen du ikasle guztiek dutela ikasketak bikaintasunean garatzeko aukera. “Dimentsio hori beraien baitan da. Hori atera egin behar da, eta irakatsi egin behar zaie. Jakin-minean kokatzen den ikasle batek eraginkotasunez eta baikortasunez erantzuten die bere inguruan dauden egoera berriei”.

Jakin-mina duen ikasle batek ikertzeko asmo bizia daukala ohartaratzen du adituak. “Bestalde inguruko gertakariez gehiago jakiteko grina izaten du eta hori suspertu egin behar da”.