Badihardugu euskara elkarteak bultzatutako ekimenaren helburua, ikasleak bertako ondarearen transmisore bihurtzea da. Herriko hiru ikastetxeetako ikasleak grabatu dituzte esamoldeak azaltzen, eta, astero, bideo labur bat zabalduko dute, herriko ahozko ondarea ezagutaraziz.

Txantxiku ikastolako, Institutuko eta Elkar Hezi ikastetxeko 50 ikasle baino gehiagok hartu dute parte, binaka. Ikasle bikote bakoitzak esamolde bat edo bi aukeratu ditu, eta esamoldeen azalpenak eta adibideak eman dituzte. Lehenengo bideoan adibidez, “Oilluak perraittera bialdu”. Oiloak ferratzera bidali esamoldea zabaldu dute. Bideo guztiak ikusgai izango dira Instagram, Mastodon, Facebook, X eta Youtuben.

Bestelako ekimenak

Herriko esamoldeak zabaltzeko ekimenaren harira, karta-jokoa ere plazaratu zuen martxoan Badihardugu elkarteak. “Arrakasta handia izan du, egun gutxitan agortu zen eta bigarren tirada bat egin da”, azaldu dute elkartetik. Horrez gain, Oñatiera lantzeko ikasmateriala ere prestatu dute.

Datorren urtera begira, egun bakoitzeko esamolde bat aukeratzea eta horiek herrian zabaltzeko asmoa du elkarteak, Oñati irratiaren bidez. “Urtero erabili daitekeen egutegia diseinatzea ere aurreikusten da, herriko sukaldeetan eta ikastetxeetan zintzilikatu eta erabili ahal izateko”, amaitu dute.