Euskaraldiaren helburua euskararen erabilera areagotzea da, euskara erabiltzeko aukerak biderkatuz eta hizkuntza ohiturak aldatuz euskaraz gehiago aritzeko. Hori lortzeko, herritar guztiei lehen hitza euskaraz egitea proposatzen die ariketak; eta horrez gain, euskaraz hitz egin ez baina ulertzen duen horri ere euskaraz egitea eskatzen die.

Euskaraldia lantzeko haur eta gaztetxoei zuzendutako proposamen didaktikoak ondu dituzte Euskaraldiko lantaldeak eta Ikastolen Elkarteko kideek elkarlanean eta proposamen didaktiko horiek Euskal Herriko ikastetxe guztietara bidaliko dira.

Euskaraldiko lantaldeak ikastetxe guztiei material hau erabiltzeko gonbita luzatu die, ikastetxe publiko, Ikastola, Kristau Eskola eta bestelako zentroetako kideei. Dena den, proposamenak modu erosoan topatuko daitezke Euskaraldiako webgunean.

Berritasunak proposamenetan

Material didaktikoak bi helburu nagusi ditu: haur eta gazteei Euskaraldiaren berri emanez, haiek ariketan
duten egitekoa azaldu eta horrek duen garrantziaren berri ematea; eta haur eta gazteen kontzientzia soziolinguistikoa piztea, informatzea, prestatzea eta ahalduntzea euskararen erabileraren
gaian agente aktibo izan daitezen. 

Horretarako, orain arte ez bezala, eta Euskal Herriko hezkuntza sistema ezberdinei erantzuteko adin tarteka osatu dira proposamenak:

  • Altxa (3-9 urte)
  • Dantza (9-12 urte)
  • Jalgi (12-16 urte)

Proposamen didaktikoak ikasleekin egiteko hamaika jarduera proposatzen dira.