Ikasturte hasteko puntuan dela Bergarako Mariaren Lagundia Ikastolako zuzendari Gotzon Iparragirrek, Oñatiko Zuazola-Larraña Institutuko zuzendari Itziar Agirrek eta Leintz bailareko Arizmendi Ikastolako zuzendari Iñaki Etxezarretak hainbat kontu azaldu dituzte. Egoera nola bizi duten, esku artean dituzten segurtasun protokoloekin zer… eta beste kontu batzuk.

Gotzon Iparragirre (Bergarako Mariaren Lagundia): “Cristina Uriartek komentatu zuen itunpekoentzako laguntza motaren bat egongo zela, baina zehaztasun handirik gabe. Gero, bizikidetza iraunkorreko talde horiek paperean definitzea oso erraza da, baina hemen 600 lagun elkartuko garen egunean hori %100 bermatzerik ez dago. Hala ere, uste dut unea dela norberak ere bere mugak umiltasunez adieraztekoa eta uste dut utzi behar diogula martxotik hona ikaragarri handitu den errudunak topatzeko joera horri”.

Itziar Agirre (Oñatiko Zuazola-Larraña Institutua): “Edukitako esperientzia izanda nire ustez hezkuntza komunitatea osoan oso argi dago eskola presentzialaren garrantzia. Ezberdintasunak berdintzen ditu eta hori da eskola batek bermatu behar duena; aukera berdinak ikasle guztientzat. Bestetik niri gustatuko litzaidake enpresa mundutik ere zer edo zer entzutea ze kontziliazio lanerako oso garrantzitsua dela”.

Iñaki Etxezarreta (Arizmendi Ikastola): “Hezkuntza sekulako rola du gizarte honetan eta badirudi errazak ez diren halako egoeratan argiago eta garbiago ikusten da hezkuntzak eta hezkuntza euskaldunak bereziki duen garrantzia gure artean. Uste dut apaltasuna eta umiltasuna garrantzitsuak direla eta irtenbidea kolektiboa dela. Beraz, hor lankide eta kooperatiboak izan behar dugula”.

Iturria: Goiena.eus