Koronabirusak ez du noski alderik egiten, baina alde nabarmenak daude lurraldeka hartu diren segurtasun eta higiene neurrien artean.

Atzo, irailak 1, itzuli ziren ikasgeletara Ipar Euskal Herriko 84.000 bat mila ikasle. Maila guztietako ikasleek ekin zioten ikasturte berriari. Nafarroan, ikasleen gehiengoa irailaren 4an itzuliko da ikastetxeetara, eta Euskal Autonomia Erkidegoan hilaren 7an. Kasu hauetan, baina, modu mailakatuan egingo da ikasgeletarako itzulera.

Musukoak, eskuen behin eta berrizko garbiketa, gel hidroalkoholikoak… ikastetxe guztietan izango dute presentzia ikasturte hasiera honetan, baina ez modu berdinean. Distantzia sozialari dagokionean, berriz, alde nabarmena dago Ipar Euskal Herriko eta Hego Euskal Herriko ikastetxeek hartu beharreko neurrien artean.

Hego Euskal Herrian sei urtetik aurrera da derrigorra maskararen erabilera bai barruan zein kanpoan. Hau da, LH1etik aurrerako ikasleek eta ikastetxeetako langile heldu guztiek erabili beharko dute. Burbuila taldeak sortu beharko dira eta taldeak ezingo dira elkarren artean nahastu eta distantzia soziala errespetatzea ezinbestekoa izango da.

Ipar Euskal Herriko ikastetxeen kasuan, aldiz, 11 urtetik aurrera izango da derrigorrezkoa maskararen erabilera, eta neurri hori errespetatuz gero ez da distantzia sozialik mantendu beharko, ez barruan ez kanpoan. Prefetak, bestalde, bertan behera utzi du azkenean taldeak nahasteko debekua.

Bazkaltzeko txandak egiteko, espazioak aireztatzeko eta eguneroko garbiketan ahalegin berezia egiteko derrigortasunak daude alde guztietan.