Ikerketek diote sare sozialekiko adikzioa areagotu egin dela

Sare sozialen erabiltzaile erdiek baino gehiagok jarduera hori beraientzat kaltegarria dela uste dute. Hala erakusten dute sare sozialen gainean egin diren hainbat ikerketak.

Boost Mobile konpainiak egindako inkesta baten arabera, esaterako, 16 eta 25 urte arteko erantzuleen erdiak menpekotasuna duela onartzen du, eta hamar pertsonatik zazpik egunean hamar aldiz, gutxienez, gisa horretako webguneak bisitatzen ditu. Sare sozialetako azken mugimenduei klasean irakasleari baino arreta handiagoa eskaintzen diete gazteen %37k, inkestaren emaitzek erakusten dutenez.

Manchesterko (Erresuma Batua) Salford unibertsitateak antzeko datuak kaleratu ditu. Erabiltzaileek azken mugimenduak jakiteko duten beharra azpimarratu du horrek ere. Hori egin ezean, zerbait garrantzitsua galtzen ari diren sentsazioa dute. Horregatik, aztertutako erabiltzaileen %38k lehenago jotzen dute Facebookera edo Twitterrera posta elektronikora baino, lanean edo ikasketetan azken zerbitzu hori beharrezkoagoa duten arren.

Egunerokotasunean kalte

Ikerketa horrek erakusten duenez, erabiltzaileen ohituretan eta harreman pertsonaletan ere eragina izan dezake sare sozialetan pasatako denborak. Salford-eko ikertzaileek ondorioztatu dutenez, %66k zailtasunak dituzte webguneotan ibili ondoren lo egiteko. Ingurukoekin dituzten harreman pertsonalak eta enpresako eraginkortasuna ere kaltetuak izan daitezke.

XXI. mendeko menpekotasuna izan daiteke sare sozialena. Buruan droga gogor batzuek martxan jartzen dituzten funtzioak pizten dituztela esatera iritsi dira ikertzaile batzuk.

Argazkiaren iturria hemen.