Ipar Euskal Herriko euskarazko irakaskuntza sareekin partaidetzan –Seaska, Ikas Bi, Biga Bai, Euskal Haziak–, familian gozatzeko euskarazko ekitaldien agenda argitaratuko du Euskal Kultur Erakundeak.

Udaberriaz geroztik dute martxan agenda webguneko Kultura familian izeneko atalean. Aurrerantzean, gainera, online berripaper berezi baten bidez hedatuko da agenda hori.

Ipar Euskal Herriko euskarazko irakaskuntza sareek proposatu zioten kultura agendaren sorrera Euskal Kultur Erakundeari. “Hutsune baten betetzea zen nahia, eskas baitzen sare horietan ibiltzen diren gurasoei eta familiei euskal kultur gertakarien berri emateko agenda bateratua”, azaldu dute.

Izenburuak dioen bezala, haurrentzako eta gurasoentzako diren hitzorduen berri emango du aurrerantzean Kultura familian agendak. Bertan, besteak beste, erakusketen, hitzaldien, kontzertuen eta askotariko ekitaldien eta emanaldien berri jasoko dute.

Urritik aurrera, gainera, berripaper batek osatuko du zerbitzu hori eta familiek harpidetzeko aukera dute informazio hori e-postaz eroso eta doan jasotzeko. Interesatuek hemen eman behar dute izena.

Argazkiak: Baionako euskal museoa eta Euskal Kultur Erakundea.