Lapurdin, Nafarroa Beherean eta Zuberoan zabalik dira, berriz ere, eskolak. Atzo, astelehena, itzuli ziren neska-mutikoak ikasgeletara. Orain arte bertaratzea hautazkoa izan bada ere, orain derrigorrezkoa bihurtu du Frantziako Gobernuak; izan ere, osasun protokoloa malgutu du.

“Ikastetxeen eta hezkuntza zerbitzuen irekitzea premia soziala eta betebehar pedagogikoa da”, adierazi du Frantziako Gobernuak gai honekin lotuta argitaratutako aginduan. “Lehentasunezko betebeharrak dira ikasleei behar duten laguntza eskaintzea aurrerapena sendotzeko ikasketetan, eta langileen eta ikasleen segurtasuna bermatzea. Eskolan eta unibertsitatean egotea derrigorrezkoa izango da ekainaren 22tik aurrera”.

Haur eskolak eta Haur Hezkuntzako ikastetxeak zabalik daude maiatzaren 11tik. Kolegioak eta lizeoak, berriz, ekainaren 2tik. Denbora honetan hautazkoa izan da seme-alabak bidaltzea. Atzotik, ordea, derrigorrezkoa.

Laster amaituko da ikasturtea Bidasoaz bestaldeko ikasleentzat. Pare bat aste ingururako itzuli dira ikastetxera. Normaltasun itxura eman nahi dio Frantziako Gobernuak ikasturte amaierari.

Argazkia: Unsplash