Bazen bitan ipuin bilduma proposatu nahi dizuegu gaur. Jatorriko izena da Érase dos veces eta Belen Gaudes eta Pablo Maciasen proiektua da. Errauskine, Edurne zuri edota Txanogorritxu moduko hainbat ipuin klasiko berridazteko lana hartu dute, eta genero-aginduetatik zein rol sexistetatik aldendu den erreferentziazko iruditeria berri bat sortzen duten ipuinak proposatzen dituzte. Ilustrazioak Nacho de Marcos-enak dira.

Euskaraz ere badaude ipuinak Bazen bitan izenpena. Hasiera batean –orain 9 urte– ipuin gutxi batzuk baziren ere gaur egun bilduma osatuago bat dago eskuragarri: Ahatetxo itsuria, Txanogorritxo, Hiru txerrikumeak, Sagutxo kaskarina, Errauskine, Loti ederra, Sirenatxoa, Ederra eta piztia, Hansel eta Gretel, Rapunzel, Edurne zuri…

“Magia eta fantasia mantendu ditugu, baina indarkeria, sexismoa, desberdintasuna eta edertasunaren gurtza alde batera utzi ditugu. Eta oso harroak, ederrak eta hezkidetzan oinarrituak geratu zaizkigu”, esan dute. “Gure alaba Bioletari ipuin klasikoak irakurtzen hasi ginenean, konturatu ginen transmititzen ari ginela printzesak zain egoten direla eta printzeek erabakitzen dutela, otsoek amonak irensten dituztela eta sorginak ez direla jakintsuak… Beraz, berridaztea erabaki genuen. Gerora gure seme Nicolasi ere irakurri dizkiogu, mutilak ere funtsezko pieza direlako beharrezko aldaketa horretan. Gizarte zuzenago baterako aldaketa haurtzarotik hasten da!”.