Seme-alabei ipuinak kontatzea hizkuntza gaitasuna bizkortzeko tresna aparta izateaz gain, onuragarria da. Baina, batez ere, momentu goxoak bizitzeko bitarteko bikaina da.

Umeei ipuinak kontatzeak onura asko eragiten dizkie. Hizkuntza modu goxo eta ludiko batean barneratzen dute, hitz berriak ikasten dituzte, eta ulermena eta mintzatzeko gaitasuna lantzen dituzte.

Baina, horiez gain, beste hainbat abantaila ere baditu, esaterako, ipuina kontatzen duen helduaren eta umearen arteko lotura afektiboak indartzen dira, umeen irudimena, jakin-mina eta sormena handitu egiten dira, sentimenduak eta emozioak ezagutzen eta ulertzen dituzte, gizartea eta mundua ulertzeko tresnak ematen zaizkie, enpatia garatzen dute…

Ipuinak hurbileko pertsona batek kontatzen baditu, umeak momentu goxo eta ederrak biziko ditu. Eta ez da ahaztu behar, edonork kontatzen ahal dituela ipuinak, baina horretarako ideia batzuk kontuan hartzen badira, kontaketa eraginkorragoa izanen da.

Euskarazko ipuinen eskaintza handia da, eta adin tarte ezberdinetarako aukera zabala dago. Ipuinak dendetan eros daitezkeen arren, liburuak eskuratzeko beste aukera asko ere badaude:

  • Liburutegi publikoak: Nafarroan liburutegien sare oso esanguratsua dago, eta bertan euskarazko ipuinak egon ohi dira. Hala ere, bilatzen den hori ez badago herriko edo eskualdeko liburutegian, beste liburutegiren batean eska daiteke liburutegien arteko mailegua erabiliz.
  • Ipuin kontalariak kultur etxeetan edo liburutegietan: Nafarroan ipuin kontaketa saio asko antolatzen dira, batez ere, kultur etxeetan edo liburutegietan. ERAko agendan ikusten ahal da saioak noiz eta non izanen diren.
  • Ipuin paseoak: ipuinak eta paseoak batzen dituzten proposamenak dira hauek. Baztanen, Malerrekan, Bortzirietan, Estellerrian edo Aranguren ibarrean egin daitezke.
  • Audioipuinak eta bideoipuinak: honako hau aukera bikaina da umeei bidaian goazen bitartean jartzeko, euskaraz ez dakiten gurasoentzako edo beharrezkoa den bestelako egoeretarako.
  • Ipuin interaktiboak: ERAk ipuin interaktiboen atala sortua du ipuinak entzun eta interakzio puntuetan jostatzeko.