Iruñerriko D ereduko Haur eta Lehen Hezkuntzako ikastetxeetan irakurketa bultzatzeko kanpaina egiten du Karrikirik, Iruñerriko euskaldunen topaguneak. Ikastetxeei “kalitatezko” haur liburuak proposatzen dizkiete zikloz ziklo mailatuta eta geroz eta gehiago dira kanpaina horretara batzen diren ikastetxeak.

Haur eta Lehen Hezkuntzako ikastetxeentzako gomendio literarioak aurkeztu ditu oraingoan Karrikirik. Horretarako, euren gomendioak biltzen dituzten hainbat zerrenda osatu dituzte. Ikasleen irakurmen gaitasuna garatzeko aproposak diren liburuak bildu dituzte eta diote heziketan parte hartzen duten guztiek irakurzaletasunaz gozatzea nahi dutela, euren ustez ezin baita irakurtzeko ohitura “elikatu gabe utzi”. Hori horrela, diote euren gomendio literarioek irakurmen gaitasuna garatzea eta sendotzea dutela helburu.

Karrikirikoek diote honako ezaugarriak hartu dituztela kontuan zerrenda osatzerakoan: Galtzagorri Elkartearen Ezinbesteko liburuak, HUHEZIk osatutako Oso gomendagarriak eta Zerrenda berezia zerrendak, eta EIBZren Kanon literarioa. Horrez gain, hezkuntzan diharduten hainbat irakasleren eta familien irizpideak ere kontutan hartu dituzte.

Lehenengo, zerrenda orokorra aurkeztu dute. Bertan, hainbat gai jorratzen dituzten liburuak mailaka sailkatuta aurki daitezke.

Hemen duzue osorik, zerrenda orokorrean jaso dituzten liburuen proposamena.

Argazkiaren iturria: Unsplash.com.