Iñaki Sanz-Azkue biologo eta irakasleak sortu zuen “Irati ikertzailearen koaderno txikia” istoria konfinamenduan zehar bere alaba entretenitzeko. Eñaut Aiartzaguenak hori sarean partekatzeko proposatu zion eta hala sortu zuten bion artean ETXEKO LEIHOTIK.  

Etxeko lehiotik proiektuaren logoa.

Zertan datza “Irati ikertzailearen koaderno txikia”?

Irati, ETXEKO LEIHOTIK istoriako protagonista da. Iñaki Sanz-Azkue biologo eta irakasleak sortu zuen istoria konfinamenduan zehar bere alaba entretenitzeko. Nik hori sarean partekatzeko proposatu nion eta hala sortu genuen bion artean ETXEKO LEIHOTIK. Konfinamenduak 15 egun iraun behar zuen hasieran eta beraz ETXEKO LEIHOTIK ipuinak 15 atal ditu. Konfinamendua luzatu arren ez zitzaigun bururatu une hartan ipuinarekin nola jarraitu eta beraz 2. faseari heldu genion: IRATI IKERTZAILEAREN KOADERNO TXIKIA. Fase honetan, egunero, ETXEKO LEIHOTIK istorian ezagututako animalia edo landare bat hurbilagotik ezagutzen dugu. Alde batetik jolas gisara planteatzen dugu eta koadernoko fitxetan ezker aldean puzzle bateko fitxa dago koloreztatu. moztu eta puzzlea osatzen joateko eta beste aldean izaki horren fitxa tekniko bat dago haurrek eta familiek animalia edo landare horren ezaugarriak ikasteko.

Zer behar da ikertzaile txiki bat izateko? 

Ikertzaile txiki batek jakinmina eta pazientzia behar ditu eta natura erreparatzeko zentzumenak adi mantentzea ere bai. Iratik prismatikoak, lupa bat, plastikozko kutxa bat, liburu bat eta koadernoa dauzka bere laborategi txikian baina bakoitzak duenarekin egin dezake. Kontua da esan bezala, zentzumenak adi mantentzea eta ingurua errespetatzea.

Konfinamenduan ere ikasteko hainbat aukera daude?

Konfinamenduan badugu ikasteko denbora eta baita hainbat eta hainbat baliabide ezberdin ere. Kontua baldintza hauetan motibazioa mantentzen jakitea da. Horregatik saiatzen gara istoria honetan ere aukera ezberdinak eskaintzen: Puzzlea osatzen joan daitezke haurrak, ipuinak irakurtzen, marrazten edo baita animalien inguruen beraien kabuz ikertu eta fitxa beraiek betetzen ere.

Beste hainbat ekintza ere prestatzen dituzue zuen webgunean… Zeintzuk?

ETXEKO LEIHOTIK eta IRATI IKERTZAILEAREN KOADERNO TXIKIA bilduma berekoak dira nolabait baina hortik aparte denborapasa koaderno batzuk aurkitu daitezke irribarrez.info/berrogeialdia webgunean. Denborapasa hauek Otsoren denborapasa kaodernoak dira eta bururatu ala sortzen eta argitaratzen ditu Otsok! Horretaz gain konfinamenduko garai hauetan ipin ezberdinak ere sortu ditut eta bertan daude irakurtzeko eta pare bat bideoz grabatuta ere bai.

Informazio gehiago nahi duenak edo eta ikertzaileen munduan murgildu nahi duenak, nora jo behar du?

Nahikoa da leihotik begiratu eta begirada zorroztea eta kalera irtetzen garenean inguru naturalak bisitatu eta hauek errespetatuz adi behatzea. Bitartean seguru naiz interneten nahiz liburuetan saltseatuz aurkituko dituela bakoitzak aberasgarrien zaizkion iturriak.

Informazio gehiagorako sartu irribarrez.info/berrogeialdia webgunean.