Azken asteotan albiste da hainbat udalerri hasita daudela haur parkeak zabaltzen. Erabakia, ordea, zeren arabera har daiteke? Norena da eskumena?

Espainiako Gobernuak alarma egoeraren hasierako dekretuetan bakarrik egin zien erreferentzia haur-parkeei. Hain zuzen ere, horiek itxi egin behar zirela agintzeko. Ordutik, dekretu gehiago egon dira deseskalatzeak iraun duen denbora honetan, baina ez da inon haur-parkeen inguruko berririk jaso.

Esan daiteke, beraz, ez dagoela irizpide zehatzik eta Udal bakoitzaren esku dagoela orain parke horien irekiera.

Gipuzkoako Debagoiena bailaran, esaterako, egon da parke horiek irekitzeko lehen saiakera bat aurreko astean. Hain zuzen ere, Aretxabaletan aurreko asteazkenean ireki zuten parke bat. Alkateak aitortu du gaizki ulertu bat gertatu zela. Ertzaintzarekin hitz egin ostean parkea irekitzea posible zela ulertu zuten Udaletik , baina gerora argibide gehiago eman zituzten Herrizaingo Sailetik eta irekiera kantxei bakarrik eragiten zien.

Zer dago baimenduta normaltasun berrian?

Bukatutzat ematen da alarma egoera. EAEn Udalek izango dute haur-parkeak, kirol-eremuak, skate pistak edo aire zabaleko erabilera publikoko antzeko espazioak kudeatzeko eta arautzeko ardura. Orokorrean, erabiltzeko baimena dago, baina pertsona bakarra egon ahalko da lau metro karratuko.

Egoera, dena den, ez da argia eta nahasmena ere sortzen du udal agintarien artea. Bestalde, neska-mutikoekin eta haiekin lotutako azpiegiturekin lotuta hartu diren erabakiak ematen dute hausnarketarako. Hasierako itxialdi zorrotza, ikastetxeen itxiera, irteerak egiteko ondoren ezarritako ordubeteko tartea, orain udaleku zerbitzuen eskasia… Umeak lagun gose dira eta premia emozional handiak dituzte. Aditu askok kezka agertu dute.

Gurasoen artean ere badago kezka hori. Zabaltzearen aldekoak dira asko, baina segurtasun neurrien inguruan galdetzen duenik ere bada.

Bideoaren iturria hemen.