Udako sasoi honetan denbora asko igarotzen dugu haurrekin igerilekutan, hondartzatan edota lakutan, baina oso garrantzitsua da hainbat gomendio kontutan hartzea. Hemen Leire Azpiazu erizainak itotzeak saihesteari buruz egindakoak eta baita flotaziorako ur-gailuei buruzko informazioa ere.

Itotzeak saihestu

Segundo gutxitan burutu daiteke itotze bat. Itotzeak 14 urtetik beherako haurretan bigarren heriotza arrazoia da eta 5 urtetik beherakoetan etxeko igerileku pribatuetan gertatzen dira gehienbat. Bestalde, adin nagusiagokoetan uretako ekintzekin lotura dutenetan ematen dira, itsaso, erreka zein lakuetan. Haur txikietan itotze bat ur gutxirekin gerta daiteke, nahiko izango litzateke 2 cm ur.

Prebentzio neurriak hartzea ezinbestekoa da itotzeak ekiditeko. Haurra beti behatuta izango dugu, horretarako, haurra guregandik beso bateko distantzian mantenduko dugu. Ez dugu haur bat beste haur baten zaintzan utziko.

Etxeko igerilekuetan, segurtasun barrerak jartzea gomendatzen da. Nahigabeko eroriko bat saihesteko neurri egokiena izanik eta ez lukete igerilekua estali beharko. Gainera, igerileku barruan mugimendua detektatzen duen alarma jartzea onuragarria izan daiteke. Itotze bat ez delako entzuten, baina neurri bakar moduan erabiltzeak ez du ezertarako balioko.

Haur nagusiagoei buruz salto egiten ez diegu utziko 1.20 cm-tik beherako igerilekuetan. Buruan kolpe batek itotze bat ekar dezakeelako.

Horrez gain, xurgapen sistemak non dauden identifikatu behar dira, xurgatzaileen ondorioz itotze bat ez izateko. Ilea xurgatuz gero, haur bat bertan itotzeko arriskua oso handia baita.

Azkenik, igeriketa ikastaroak itotze tasak jaitsi ditzakete. Batez ere, 4 urtetik gorakoetan gomendatzen da ikastaro hauek burutzea. Baina, igeri egiten jakitzeak ez du haurraren segurtasuna bermatzen eta beharrezkoa da haurra denbora guztian behatuta izatea.

Flotaziorako ur-gailuak

Lehenik eta behin, ur-gailuen funtzioa zein den garbi eduki behar dugu. Hauek ez dute itotze bat saihestuko, haurra flotatzen mantentzea da beraien funtzioa, baina beste edozein faktorek hori bertan behera utz dezakete. Adibidez, xurgatzeko sistemak haurra harrapatuz gero, flotazio gailuak ez luke ezertarako balioko.

Airezko flotazio gailuak ez dira gomendatzen, segurtasun sentsazio faltsu bat ematen dutelako. Edozein unetan mangito edo flotadore horrek haizea gal dezake, eta beraz, bere lana egiteari utzi.

Beraz, flotaziorako gailuren bat aukeratzerakoan txalekoa aukeratuko dugu eta homologatuta egon beharko du.