Euskaldunok itsaslapurretan karta-jokoa sortu du Trikuharri Kultur Elkarteak. 40 karta eta ilustrazio ditu. Euskal Herriko itsaslapurren historia kontatzea eta nabarmentzea da elkartearen helburua.

Ekaitz Zabalza dago ekimenaren atzean. “Muserako karta-jokoen egitura berbera du. Aproposa da ezagutzen ditugun jokoetan aritzeko, baina eduki historikoarekin”.

Aurretik, Nafarroako konkistaren historian oinarrituta karta-jokoa sortu zuten, eta harrera ona izan zuen. Hala, sortu zen Trikuharri Kultur Elkartea. “Helburua da historia gaien inguruko karta-jokoak egitea. Itsaslapurrak gure bigarren karta-jokoa da”.

Zabalzak Dani Fano marrazkilaria eta gidoigilea izan du lagun abentura honetan. “XIV. mendean, gure presentzia oso nabarmena zen itsasoan, eta, bereziki, itsaslapurretan. Harrigarria da gaur egunera horren gutxi iritsi izana”, azaldu du. “Karta-joko honekin erakutsi nahi dugu gure historian badaudela euskal piratak eta kortsarioak, izen-abizenekin. Sekulako abenturak daude dokumentatuta”.