Debagoieneko Antzerki Plataformako kideek bailarako eskoletako ikasleei antzerkigintza klaseak ematen dizkiete. Iurgi Etxebarria aretxabaletarra da irakasleetako bat eta Debagoieneko sei ikastetxetan ematen ditu tailerrak, oraingoz. Asmoa da guztietara heltzea.

Tailer horietan landutako diziplina hainbat esparrutarako zaie baliagarria neska-mutilei: talde kohesioan eragiten du, publikoaren aurreko antzezlana fintzerako orduan, irudimena zein konfiantza lantzeko…

Iurgi Etxebarria Kukubiltxo antzerki taldean ibilitakoa da urteetan, eta ikasleei interpretazioaren inguruko kontzeptuak irakasten dizkie, nola ez. Horrekin batera, ordea, beste hainbat esparru jorratzen dituzte. “Tailer honek hogei ordu ditu, eta 20 ordu horietan alde batetik dago antzezlana –gero gurasoen aurrean antzezten dena–, eta bestetik dago antzerkiarekin ondo pasatzeko jaso behar den diziplina. Bi ibilbideak ez dira ezer bata bestea barik”.

Etxebarriak antzezle zein ikusle paperean jartzen ditu ikasleak. “Ikusle paperean daudenean konturatzen dira pertsonaiek ez dutela ahoskatzen, bizkarra ematen dutela…, eta halakoak”. Ez da tailerraren helburu bakarra: “Disfrutatzea da gakoa eta hasieratik azpimarratzen zaiena da ez dagoela akatsik. Irudimenarekin egiten denean ez dago akatsik”.

Etxebarriak azaltzen du burua astindu bat emateko ere balio duela antzerkiak. “Ikasle bakoitzak aukeratzen du bere pertsonaia eta baita ere pertsonaia hori ze sexualitatekoa izango den. Neska, mutilak, homosexuala, transexuala… Askok esaten dute: “Nirea normala”. Eta erantzuna da: “Denak izango dira ba normalak, ezta?”. Horrek zer pentsatua ematen die eta hori da beste helburuetako bat, buruari astindu bat ematea”.