Aurtengo apirila eta ekaina bitartean jaiotzak %2,9 jaitsi dira, iazko epe berarekin alderatuz gero. Hala ere, jaitsierarako joera moteldu egin da, izan ere, lehen hiruhilekoan jaitsiera erlatiboa % 12,5ekoa izan zen.

Urtearen bigarren hiruhilekoan 3.523 haur jaio ziren EAEn; lehen hiruhilekoan baino 216 haur gehiago badira ere, iazko epe berarekin alderatuta % 2,9 jaitsi da oraingoan jaiotza kopurua.

Duela urtebete baino haur gutxiago jaio dira bigarren hiruhilekoan, baina beheranzko joera moteldu egin da, lehenengo hiruhilekoarekin alderatuz gero; izan ere, 2021eko lehen hiruhilekoan urte arteko jaitsiera erlatiboa % 12,5ekoa izan zen.

Lurraldeka, urtetik urterako jaitsiera hiru lurraldetan gertatu da, baina Araban izan da nabarmena –% 5,6 gutxiago–; Gipuzkoan % 2,7 jaitsi da eta Bizkaian % 2. Zifra absolutuetan, Bizkaian 1.737 haur jaio ziren, 1.209 Gipuzkoan eta 577 Araban.

2021eko apirilean, maiatzean eta ekainean, ezkontzaz kanpoko jaiotzak guztiaren % 47,9 izan ziren, 2020ko hiruhileko berean izandako % 46,9 baino gehiago. Bizkaian % 50 izan ziren ezkontzaz kanpoko jaiotzak eta lurralde hori izan zen batezbestekoa baino balio handiagoak izan zituen lurralde bakarra; Araban eta Gipuzkoan portzentajeak txikiagoak izan ziren, % 47,5 eta % 44,9, hurrenez hurren.

Jaiotza-hurrenkeraren arabera, bigarren hiruhilekoan jaiotakoen ia erdiak –1.709– lehen seme-alabak izan ziren; 1.349 haur –% 38,3– aurretik beste bat zegoen familietara iritsi ziren, eta % 13,2koa izan zen hirugarren edo ondorengo ordenako jaiotzen ehunekoa.

40 urtetik gorako amak, % 10 baino gehiago

30-39 urte bitarteko amak izan dira gehiengoa, horien artean erditzeen % 70,6 gertatu baitziren. Aurrekoaren oso azpitik zeuden 25 eta 29 urte bitartekoak –% 12,3– eta 25 urtetik beherakoak –% 6,2–, eta 40 urtetik gorako amak % 10,9 izan ziren.

Argazkiaren iturria: Unsplash.com.