Ez badugu nahi gure seme-alabak xantaiak normalizatzea, lehenengo urratsa izango da guk ez xantaiarik egitea.

“Jaso zure jostailuak ala ez gara parkera joango”. Hori izan daiteke zure seme-alabak egongela osoan zehar dauzkan jostailuak jasotzeari uko egiten dionean noizbait esan nahi izan diozun esaldia. Baina garrantzitsua da umeak xantaiarik gabe heztea, Andrea Zambrano hezkuntza arloko coach-ak dioenez.

Haurra zenbat eta okerrago sentitu, orduan eta prestasun gutxiago izango du egin beharko lukeena egiteko. Beste era batera esanda, zenbat eta gehiago sartu behartzeko/inposatzeko jarreran, orduan eta kontrol handiagoa galtzen duzu egoeraren gainean.

Zambranok azaldu du horrelako egoera baten aurrean hark egin zuena. Umea hartu eta altzoan eseri zuen lasai. Auto bat bere burutik zirkularazten hasi zen, errepide bat balitz bezala. Eta amak jarraitu egin zion. Horrek aukera ematen zion umearekin konektatzeko eta euren artean komunikazio-bide bat irekitzeko. Behin konektatuta –eta dio hori dela garrantzitsuena–, esan zion: “Parkera joango gara eta lehenago jaso beharko dugu. Lagunduko dizut”. Eta kotxe bakoitza bere kaxan sartzen zela ospatzen zuten.

Fokua, konponbidean

Kontuan izan behar da presaka bazabiltza, horrek ez duela funtzionatzen. Eta, egia esan, ezin da beti egin. Hala ere, askotan, gure seme-alabekiko harremana konektatzeko eta sendotzeko uneak aurki ditzakegu. Fokua konponbidean jartzea, arazoan jartzea baino askoz eraginkorragoa da coach-aren esanetan.

Beraz, antzinako ohiturek ez badute funtzionatzen hezteko orduan, zer egingo dugu hemendik aurrera? Hor dago guraso, irakasle eta beste askoren kezka.