Hasteko, 250gr irin, 100gr azukre beltz, koilarakada bat jengibre birrindu eta gatz apur bat nahastu behar dira ontzi batean.
Ondoren, nahasketari irabiatutako arrautza bat eta aurrez urtutako 140gr gurin gehitu behar zaizkio. Dena eskuekin nahastuta, orea uniforme bat lortzen da.
Mahaia irineztatu ondoren, arrabolaz orea zabaldu behar da, zentimetro erdiko lodiera lortu arte. Hortik aurrera, orea moztuz, gailetei nahi den forma eman dakieke.
Labera sartzeko erretiluan, gailetak laberako paperaren gainean jarri behar dira. Aurrez 180 gradutan berotu ondoren, hamabost edo hogei minutuz sartu behar dira labean, xigortu arte.
Gailetak bere horretan jan daitezke, baina baita azukre hautsarekin edo urtutako txokolatez estalita ere.