Ikasturte hasierarekin batera, haur eta gaztetxo ugarik ematen dute izena eskolaz kanpoko jardueratan. Gaur egun askotariko eskaintza izaten dute, eta horietan falta ez denetako bat igeriketa ikastaroena edota ur ekintzena izaten da.

Gaur egun, sei hilabetetatik hasi eta bi urtera bitarteko umeak gurasoekin edota erreferente duten pertsonekin joaten dira saio horietara. Eta hiru urtetik aurrerakoak, kasu askotan behintzat, dagoeneko gurasoen presentzia gabe jarduten dira uretako ikastaroetan. Horixe azaldu du Athloneko Jokin Atxagak.

Hauxe gaineratu du: “Ikasturtean zehar printzipioz gure filosofia izaten da saioak alde ludikotik bideratzea. Jolasaren bitartez, hainbat gauza lantzen ditugu. Ikusten dugu gainera umeek igerilekua leku atsegin bat bezala ikusi behar dutela, jolasteko beste ingurune seguru baten moduan, eta ezin dira etorri askotan bizi izan dugun moduan, igerilekuan sufritzera”.

Atxagak adierazi du baita ere askotan igerilekuak nahikoa errespetu ematen duela eta saio horiek ezin direla analitikoak izan. Nahiz eta gaineratu duen, egia dela adin batetik aurrera, umeak bai hobetu behar duela igeriketa teknikoa, baina printzipioz, euren asmoa izaten da arlo ludikotik eta jolasen bitartez, ikasturtean zehar umea oinarrizko ezagutza horiek barneratzen joatea.