Senpere Lapurdiko erdialdeko udalerria da. Bereziki ezaguna da aintziragatik eta bertan ospatzen den Herri Urrats-engatik. Urdazuri da herria zeharkatzen duten hiru erreketako bat eta ertzean aisialdirako oso egokia den parke ederra du.

Urdazuri erreka-bazterreko parkea herriaren erdian dago, elizaren ondoan. Berdegune lasaia da eta mugikortasun murriztua dutenentzat irisgarria. Ibilbide guztian, uraren inguruko zizelkadurak aurkitzen dira. Mahaiak, eserlekuak, ibilbide lau bat, iturria, berdegune zabala eta haurrentzako jokoak ere badaude. Ipar Euskal Herrian hain ezaguna den petankan aritzeko bi eremu handi ere badaude.