Jolasen gomendioak. Lan ildo berria egitasmoan.

Lan ildo berri bati ekingo diogu Guraso.eus egitasmoan. Jolasak, mahai jolasak eta bestelako baliabideak gomendatuko ditugu Arrasateko Olgeta proiektuarekin elkarlanean.

Hamabost egunean behin jostailu bat aurkeztuko dugu, eta azalpenak emango ditugu; nola jolasten den, zein adinetarako den egokia, zergatik den gomendagarria…

Aurkezpenak bideo formatuan izango dira, guztiak Olgetan grabatuak eta gutxi gorabehera bost minutuko iraupenekoak. Olgetako arduradun eta Guraso.eus-eko kolaboratzaile Itsaso Pagoaga izango da jostailuak aukeratu eta aurkeztuko dizkiguna. Bideoen ekoizpena Goienak egingo du.

Lan ildo berri honekin euskaraz zegoen hutsune bat bete nahi dugu. Hainbat jostailuren azalpenak sareratuko ditugu merkatuan dauden jostailu berrien inguruko informazioa euskaraz eskainiz eta bide batez jostailuarekin dugun lehen harremana euskaraz izatea ahalbidetuz.

Guraso.eus-eko bideotekan izango dituzue bideo guztiak baita ere eduki horiek gordetzeko Youtuben sortu dugun kanalean ere.

Egitasmo hau baliabide berria izango da jolasa gustuko duen edonorentzako, baita ere aukera berri bat gozamena eta euskara elkar lotzeko!

Hona hemen ekoiztutako lehen bideoa.