Gorbeiako natura parkea Araba eta Bizkaia arteko mugan aurkitzen da, eta Sarria herrian dagoen parketxearen bueltan jarduera asko egin daitezke familian. Mendi txango ugari abiatzen dira bertatik, mahaiak, komunak eta aparkalekua ditu, eta baita ere umeentzako jolasguneak. Bainua hartzeko putzuak ere nabarmentzen dira.

 

Gorbeia mendiak (1.481 m) menderatzen du 20.016 hektareako parkea da. Jolas-ekipamenduz hornitutako hainbat eremu ditu eta bisitarientzako bi zentro daude: parketxe bat Arabako Sarria herrian eta beste parketxe bat Bizkaiko Areatza herrian.

Sarriako gunean aparkalekua, komunak, mahaiak eta umeendako txintxaunak daude. Espazio horretatik hamar bat minutura oinez bainua hartzeko putzu ederra dago. Zaldibartxo putzua esaten diote. Ur garbiak eta hotzak dira. Udan jende ugari gerturatzen da.

Gorbeiako parke naturala

Egun pasa ederra egin daiteke inguru horretan. Gorbeian, oso paisaia desberdinak ditugu: harri malkartsuak, larredi leunak, pagadi eta hariztiak eta abar. Gainera, Itxinako Biotopo Babestua eta 100 metrotik gorako Goiuriko ur-jauzia ere oso paisaia-elementu azpimarragarriak dira.

Informazio gehiagorako:

 

Sarriako Parketxea: Sarria, Zuia
Telefonoa: 945 430 709
parquegorbeia@parques.araba.eus

Areatza Parketxea (Bizkaia): Gudarien Plaza 1, Areatza
Telefonoa: 946 739 279
gorbeia.parke.naturala@bizkaia.eus