Jolasparkeak.eus. Bidali zure proposamena

Jolasparkeak.eus atariak jolas parke eta jolasgune ezberdinak proposatzen jarraitzen du.  38 gune edo jolas parke daude gidan jada.

Aurrera begira ere Euskal Herrian dauden Jolasgune eta jolas parke ezberdinak argitaratzeko asmoarekin jarraitzen dute. Honetarako  proposamenak jasotzeko bidea ere martxan da eta herri ezberdinetan dauden jolasgune aproposak edo jolas parke ezberdinak ezagutu nahi dituzte.

Herrian edo herritik irtenda familian egoteko, gozatzeko, dagoen gune hori eta gure haurrari horrenbeste gustatzen zaion jolas parkea.

Baina, zer nolako jolas parkeak dira eskatzen ditzutenak? Hona hemen irizpideak.

1.- Jolas parkea ahalik eta material naturalenekin egina izatea.
2.- Jolas parkea osatzen duten elementuek motrizitatea, sormena eta haurraren abentura sena sustatzea besteak beste.
3.- Herrigintzatik abiatutako prozesuak izatea. (auzolanean, prozesu parte-hartzaileen bidez…)
4.- Kolore neutroak izatea.
5.- Doakoak izatea.
6.- Estaliak izatea.
7.- Kanpo espazioan jolaserako aukera eskaintzea.

Zer da Jolasparkeak.eus?

Jolasparkeak.eus ataria, Euskal Herriko jolasguneen gida bat da. Bertan zazpi herrialdeetako aire libreko jolaserako espazioak aurkituko dituzu. Baina ez edozein gune, alajaina; izan ere, jolaserako hainbat espazio daude gurean eta guk, gida honen egileok, gune esanguratsuenak hautatu ditugu. Eta zergatik hori? Bada, azken hamarkadetan ohikoa bilakatu delako patroi berdineko jolas parkeak eraikitzea han eta hemen. Hainbatetan entzun dugu haur bakoitza mundu bat dela. Beraz, zergatik eskaini jolaserako espazio berdinak haur guztiei?

Adituek eta arituek hainbat aldiz esan dute haurrek berezkoa duten jolaserako sena kamusten dutela patroi berdina erabiliz eraiki diren jolas parke hauek: partxis koloreko ziburuez, txirristez eta abarrez osatutakoak, alegia. Eta aldiz, arituek, hau da haurrek, behin eta berriz erakusten digute jolaserako edozein espazio dela egokia edo egitura berdinez ostatutako jolas parkeei beste erabilera bat ematen dietela; gora eta behera ibiltzea, makilekin eta lurrarekin errekastoak eraikitzea, hanka bakarrean saltoka aritzea, eta nola ez ezkutaketan aritzea. Horretarako eta beste hainbat eta hainbat jolaserako nahikoa dira gune irekiak eta moldaerrazak.

Norberaren jolas esperientzian atzera egin ezkero hortxe aurkituko ditugu kontzejupeak, parkeak, frontoiak, plazak, bolatokiak… eta beste hainbat jolaserako espazio. Eta ez dira derrigorrean eta espreski jolaserako sortutako jolas parkeak.

Guk halaxe izendatu dugu gida hau, jolasparkeak.eus. Gure iritziz, polita izan daiteke txikitako jolasgune horiek akordura ekarri eta berreskuratzeko saiakera egitea. Baina ez hori bakarrik, eraiki diren jolas parkeen artean ere badira material naturalez egindakoak direnak, moldaerrazak direnak, prozesu parte-hartzaileen bidez egin direnak edo haurraren motrizitatea, sormena eta abenturarako sena sustatzen duten elementuez osatutakoak direnak. Horiek bildu eta ezagutzera ematea ere gustatuko litzaiguke.

Zer aurkituko duzu bertan?

Bi multzotan sailkatutako aire librerako jolaserako espazioak aurkituko dituzu bertan. Alde batetik jolasguneak eta bestetik jolas parkeak.

. Jolasguneak: jolaserako ere egokiak diren aire libreko espazioak. Hala nola; plazak, parkeak, frontoiak, kontzejupeak…
. Jolas parkeak: jolaserako espreski sortutako parkeak.

.