Zeresan handia eman dute Lionel Top kazetariak Frantziako eskolen irekieraren inguruan kaleratutako argazkiek. Bertan ikus daitezke, besteak beste, haur hezkuntzako adinean dauden neska-mutikoak jolastoki orduan lurrean margotutako laukietatik mugitu ezinik, edota musukoak dituzten irakasleak entzuten. Horrekin batera, distantziak mantentzeko lurrean margotutako gurutzeen gainean esertzen ikasten ari diren umeak edota gurutzatu ezin diren zinta zuri-gorriekin banatuta daude ikasgelak…

Aditu ugarik kezka agertu dute, eta ohartarazi dute halako neurriek ondorio larriak eragingo dituztela garapen egoeran dauden neska-mutikoen artean.

“Ez da beharrezkoa hezitzailea izatea neurri horietako gehienek haurrekin eta gazteekin inplementatzearen zailtasunaz eta eromenaz jabetzeko. Hori lortzeko bidean arrakasta izateak ere, paradoxikoki, irakaskuntza-lanaren porrota adierazten du”, adierazi du Heike Freire pedagogoak.

“Pedagogook ondo dakigu diskurtso arrazionalaren gainetik emozioa dela nagusi haurretan; hitzik gabeko komunikazioa. Eta haurrei azaltzea neurri horiek guztiak COVID-19tik babesteko direla ez du inolaz ere hezten. Aitzitik, bestelako mezuak inprimatzen dira haurraren izpiritu delikatuan:
Zure gorputza arriskutsua da besteentzako edota Zure ikaskideen gorputzak arriskutsuak dira zuretzat edota Zure familia ez da ongi etorria hemen“.

Freirek ohartarazten du halako mezuak oso desegokiak direla egoera edozein izanda ere, eta zer esanik ez hilabetez konfinatuta egon diren adin-txikikoentzako. Antsietatea, beldurra, edota erru-sentimendua eragin dezakete jarrera eta egoera horiek aurretik ere sozializazio-gabeziak pairatu eta seguruenik garbitasunarekin obsesionatuak egon daitezkeen umeengan.

Badira profesionalak egoera horretan nahiago dutenak eskolara ez itzultzea, eta badaude gurasoak baldintza horietan seme-alabak ikastetxera ez bidaltzea nahiago dutenak. Baina egoera guztiak ez dira berdinak.

“Edozein epidemiaren gainetik, haurrek ez dute merezi haurtzaroaz erabat gozatzeko? Zentzuzkoa al da eskolen irekiera COVID-19ren arabera egitea, eta ez hezkuntza-premietan oinarrituta? Zer ebidentzia dugu iragarritako neurriek izurritea berriro ager ez dadin balio dutela esateko?”. Horiek Heike Freireren hainbat galdera. Eta debatea zabalik da.