‘Kuikui’ naturaren eta hizkuntzen aldeko lana aurkeztu dute Pirritx, Porrotx eta Marimototsek eta aitzakia honekin Joxemari Agirretxerekin (Porrotx) hitz egin dugu; Mundua aldatzeko gakoez, hegan egiteaz, izokinez, haurren begiradaz… jardun dugu.

Pirritx, Porrotx eta Marimotots pailazoek KUIKUI proiektua abiatu dute.

“Zabaldu besoak, 

astindu hegoak… 

eta saltooooooo! “

Hegan egiteak urrutira ikusteko aukera paregabea eskaintzen du. Bizi ditugun arazo era gabeziak antzemateko, behar ditugun irtenbideak marrazteko, irriz, kantuz eta kolorez… 

Miren Amurizak idatzita, Irrimarrako Karmele Gorroñok eta Irene Iruretak ilustratuta, Xabier Zabalaren 12 abestiekin jantzita (5 grabatu berri) eta pailazoek kontatu eta kantatuta osatu dute elkarlanean CD-liburua.

Zer konta? Zer kanta?…”Munduak txorien kantuak eta herrien hizkuntzak behar dituela!”

Ikuskizuna ere plazaratu dute urtero moduan, eta ipunetik tiraka bestelako gaiak ere jorratzen dituzte bertan.

“Hegan, urrutira begiratuta, hara non balea topatuko dugun sudurgorriok, plastikoz betea, Txo Mikmak indio txikiarekin eta pinguinoarekin batera hurbildu dena itsasertzera”

Eta Tider migrantea, Baionarako bidean, Bidasoan, hontza mugalariaren laguntza aurkituko duena. 

Eta azkenik Ilargi baserritarra, bere oiloarekin datorrena. Margarita txitatzen ari den arraultzetik jaiotzear da txitakolorea, munduari oparituko dizkiona bere koloreak… 

– TXORIEN HABIA-KUTXA OPARI… 

Aranzadi Zientzia Elkartearen eskutik Txorien habia-kutxak oparituko dizkiegu pailazook herrietan   txorientzat eta euskararentzat, egunerokotasunean, habia goxoak sortzen dituzten taldeei. Honela, Aranzadiren Txoribox egitasmoa zabaltzea ere bada pailazoon xedea