ATX Teatroa taldea han eta hemen eskaintzen ari den Kaskarot izeneko familia ikuskizuna ekarri nahi dugu gaurkoan gurera. Lanak hainbat gai azaleratzen ditu: ezberdina izatearen beldurra, lehenengo harremanen lotsak, nola ahazten dugun gure esentzia… Eta hori guztia Aner izeneko gaztetxoaren begietatik bizi du ikusleak, Anerren eta haren alter egoa den Kaskaroten eskutik.

Antzerki taldeko zuzendaria da Iñaki Ziarrusta. “Oso gutxitan ekartzen ditugu umeen arazoak taula gainera. Askotan, umeei zuzendutako lanak egiten ditugunean umekeriak egiten ditugu. Gauza arinak, koloretsuak, festa giroa… Eta esango nuke umeen arazoak eta nagusienak berdin-berdinak direla. Sei urte ditugunetik 80 urte egiten ditugunera arte arazo berberak ditugu, baina logikoki, bakoitza bere mailan. Eta guk umeek dituzten arazoetako batean oinarrituta antzezlana sortu gura izan dugu. Ez ditugu arazo guztiak ekarriko, baina bati heldu diogu”.

Aner da Kaskarot antzezlaneko protagonista. Dantzatzea izugarri gustatzen zaion gaztetxo bat da, baina hain zuzen, dantza egitea debekatuta dagoen gizarte batean bizi da. “Egoera distopiko bat sortu dugu, erreala ez dena, baina errealitate batera egokitzen ez den gaztetxo baten kasua erakusten duena. Anerrek ezin du gehien maite duena egin, eta lekuz kanpo sentitzen da. Hori da abiapuntua”, azaltzen du Ziarrustak.

Eta Aner Kaskarot bihurtzen denean da zoriontsu. Eta hor pertsona orok dugun dikotomia agertzen da. “Kaskarot pertsonaia positiboa da, alaia, Anerri arazoak konpontzen lagunduko diona, eta bestea da Ilunsaku. Ilunsaku da iluna, negatiboa, rollo txarra ematen duena… Eta, krisi momentu batean biak azalduko zaizkio Anerri, eta ikusiko dugu krisialdi hori zelan gainditzen duten hirurek”.

Zer da desberdina izatea?

Izan ere, hori da galdera: zer da desberdina izatea? “Anerrek bere burua desberdin sentitzen du, eta horrek joera ezkor batera eramaten du. Eta, hor ikasiko du kudeatzen bere positibotasuna, baina baita bere negatibotasuna ere. Izan ere, gizaki orok bi sentimendu horiek behar ditu, hau da, ezin dugu beti positibo izan. Ulertu behar dugu bi sentimenduak kudeatzen ikasi behar dugula, biak izan behar ditugula”.

Argazkiaren iturria: atxteatroa.eus