Espainiako Pediatria Elkarteak Covid-19rekin lotutako sintoma berrien berri eman zuen martxo bukaeran. Erresuma Batuko, Italiako, Belgikako eta Frantziako hainbat medikuk ere adierazi dute haurretan bereziki ikusi dituztela sintoma batzuk gerora larritu direnak, eta aztertzekoak direnak. Helburua da ikustea ea loturarik duten koronabirusarekin. Kawasaki sindromea aipatzen dute.

Koadro horien ezaugarriak dira sabelaldeko ezohiko mina, eta sintoma gastrointestinalak –beherakoa eta/edo gorakoak–. Bestalde, sukarra, eritrodermia eta konjuntiba-injekzioa ere egon daitezke. 

Euskadi Irratiko Osasun Etxea saioan Felix Zubia medikuak lasaitasun mezua igorri du. “Hasiera batean, behintzat, ez dadila inor larritu”, esan du. “Ez dezala inork pentsatu orain bat-batean etxeko haur guztiak errenkadan gaizki jarriko zaizkigunik horretarako arriskurik ez dagoelako”. Berez, sendagarria den gaixotasuna dela ziurtatu du Zubiak, baina garaiz hartu beharrekoa eta azaldu du normala dela ohiz kanpoko edozein sintomaren pilaketa gertatzen denean aztertzea loturarik duen ala ez koronabirusarekin.

“Gertatzen dena da oso kasu gutxi ikusten direla, eta orain igoera txiki bat ikusi dela. Ez da ikaragarria izan eta pediatren lana izango da, eta lan garrantzitsua da, kasuen igoera txiki horrek koronabirusarekin lotuta dagoen ala ez aztertzea. Denborak esango du”.

Kawasaki sindromearen sintomak

Gastrointeritis akutuak ikusten dira haurren artean aurrez adierazitako herrialdeetan. Sabeleko mina, beherakoa, gorakoa… dira sintomak. “Berez, gaixotasun auto-immunea litzateke. Hau da, infekzio bat pasa ostean –kasu honetan koronabirusa litzateke– gorputzak defentsak sortzen ditu, eta defentsa horiek kalte egiten diote gorputzari. Hain zuzen ere, larruazalari, arteria txikiei eta horien artean bihotzari ere bai”.