40 urteko ibilbidea duen Antzuolako Herri Eskolako eredu pedagogikoaren gaineko hirugarren tesia aurkeztu berri du Maitane Basasorok, EHUko irakasle eta ikerlariak. Komunitatearen indarraz eta garrantziaz jardun du.

Antzuolako Herri Eskola ikaslea ardatz duen hezkuntza eredu pedagogikoan aitzindaria da. Ikaslearen ongizatea bilatzen duen etengabeko hezkuntza-proiektua da. Ikasleak erabakiak hartzean ditu, eta ikaskuntza prozesuan protagonismoa dauka, irakaslea bidelagun duela. Komunitatearen indarra ezinbestekoa da, ordea, ikasketa bidaia honetan. Eta Antzuolako ereduaren garrantziaz jakitun, Maitane Basasoro irakasle eta ikertzaileak doktore-tesia aurkeztu berri du: “Antzuolakoa eredu berritzaile gisa nazio eta nazioarte mailan ezaguna da, eta Hezkuntza Sailak ere hala berretsi du. Hori indartzen duten argitalpen zientifikoak ba-daude, eta baita aurretik egindako beste bi doktore-tesi ere: Xabier Arregirena eta Andoni Argñanorena.

Master amaierako lana hemen egin nuen, eta ikusi nuen bazela gune aproposa ikasleen parte-hartzearen inguruan arakatzeko. Garrantzitsua izan da 40 urteko ibilbidea izatea ereduak, eta esanguratsua ere eskola publikotik abiatutako proiektua izatea”.

Ikaslea erdigunean jartzea herritar eta pertsona bezala hazteko eta hezteko garrantzitsua dela dio ikerlari oreretarrak: “Proiektuak ikasleen interes eta jakin-minetatik abiatzen dira. Erabakitzen dute zer jakin eta egin nahi duten eurek erabakitzen duten proiektu baten baitan. Curriculum parte-hartzailea ere egin daiteke ikasleen interesetatik abiatuta. Irakasleen begi- radaren garrantzia ere azpimarratzen dut tesian, baita curriculum parte hartzailearen garrantzia ere; antolaketa eredua birpentsatzearen inguruan klabeak ere jaso ditut”.

Komunitatearen indarra

28 belaunalditako ikasle ohien bizipenak jaso ditu. “Horien parte hartzea sustatzen duten gakoak identifikatzeko eztabaidak egin ditut. Komunitatea eskolaren parte ere badelako”.