Konfinamendu egoeran haurrek zenbat D bitamina hartu beharko luketen eta nola adierazi du pediatria zerbitzuak. Horrez gain, hainbat gomendio eman ditu gai horren harira.

D bitaminarekin lotuta pediatria zerbitzutik azaldu dute bitamina lipodisolbagarri bat dela (koipea) kaltzioaren metabolismorako eta haurren hezur-osasun zuzenerako garrantzitsua dena. “D bitaminaren eskasia luzatzen denean, errakitismoa bezala ezagutzen den gaixotasun bat sor daiteke”, argitu dute. “D bitamina lortzeko bide nagusia larruazala da, eguzki-izpien bidez sintetizatzen duena; ehuneko txikiagoan, elikaduragatik lortzen dugu”.

Konfinamendu egoeran hartu beharreko neurriak

Konfinamendu egoera honetan, haurrei eman beharreko D bitaminen inguruan ere mintzatu da pediatria zerbitzua: “Gaur egungo osasun-egoera kontuan hartuta, pentsa daiteke beharrezkoa dela haurrei D bitaminaren osagarria ematea; hala ere, hori ez da nahitaez horrela. Osasun-alerta dela eta, hilabete batez etxean egon behar badugu ere (bi hilabetez luza liteke), haurrei eguzkipeko egonaldi osasuntsua kenduta, ez da beharrezkotzat jotzen D bitaminaren aho bidezko osagarririk ematea egunero, ez behintzat haur guztiei”.

Azkenik, gai honi buruz zalantzak izanez gero, umearen pediatrarekin harremanetan jartzeko gomendatu dute, baina horrekin batera, egunean hartu beharreko D bitamina kopurua zein den adierazi dute: “400 UI/eguneko da 12 hilabetetik beherakoetan, eta 600 UI/eguneko haur nagusiagoetan (eta 70 urtera arte)”.

Haurren elikadura

Haurren elikadurari dagokionez, pediatria zerbitzutik adierazi dute, 12 hilabetetik beherako bularreko haur guztiek, amagandiko edoskitzea edo artifiziala jarraitzen badute ere, D bitaminaren gehigarriak hartu behar dituztela, ama-esnea bitamina horretan urria baita, eta balitekeelako haurrek egunean litro 1 esne ez hartzea.

Urtebetetik aurrerako haurrei dagokienez, berriz, nolako elikadura izan behar duten azaldu dute: “Egunero litro 1 esne (4 esneki egunean, adib. gazta), arrain koipetsu urdinak, hala nola sardinzarra, izokina, berdela eta atuna latan (ez atun gorria ez harrapari handiak), arrautza-gorringoa, haragia eta zenbait elikagai aberastu (zenbait esne edo zereal) izan beharko lituzke, eguzkiaren eraginpe normalean egoteari gehituta, nahikoa litzateke eguneroko beharrak asetzeko”.

Argazkiaren iturria: Andrew Seaman