Gipuzkoako Foru Aldundiak antolatzen du Eskola Kirola programa eta arduradunek aurreratu dute aste tarteko saioak urrian hasiko direla, eta txapelketak, berriz, urtarrilean. Noski, egoera epidemiologikoak ahalbidetzen badu.

Bilera egin ostean Gipuzkoako Eskola Kirola programan parte hartzen duten 350 bat eragilerekin –kirol erakundeak, ikastetxeetako koordinatzaileak, ikasleak, gurasoak…– Foru Aldundiak erabaki du ekimena urritik aurrera martxan jartzea. Hori bai, kontaktu fisikorik gabeko jarduerak izango dira eta infantil eta alebin mailetako lehiaketak urtarrilera arte ez dira martxan jarriko.

Erabakia hartu da kontuan izanda jarduera fisikoak eta kirolak lotura zuzena dutela haurren osasunarekin eta ongizate psikologikoarekin. Aldundiko Kultura eta Kirol diputatu Harkaitz Millanek esan du: “Eskola Kirola erabat geldiaraziko bagenu kalte handia egingo genieke aukera gutxiago dituzten ikasleei”. Asko eskolaz kanpoko jarduerarik egiteko aukerarik gabe geldituko liratekeela gaineratu du, eta nabarmendu dute baita ere geldialdik eragin ezkorra izango lukeela nesken kirol jardueran.

Iaz, Lehen Hezkuntzako ikasleen %79

Iaz, Lehen Hezkuntzan matrikulatutako ikasleen %79 izan zen Eskola Kirola programan.

2020-2021 denboraldiko eskola kiroleko programetan kontaktu fisikoa saihestu beharko da eta pertsonen arteko distantzia bermatu. Hala, kirol diziplinetako jarduerak eta lehiaketak egokitu beharko dira joko-arauak aldatuz.

Halaber, hezitzaile guztiek Kirolaren Euskal Eskolak abian jarritako prestakuntza ikastaroa egin beharko dute. Izen-ematea zabalik da irailaren 30era arte.

Kontaktu kopurua murrizte aldera, bestetik, hainbat neurri hartu beharko dira jarduerak, entrenamenduak edo lehiaketak egiteko:

  • Talde txikiak. Gehienez hamabost pertsona.
  • Saioak edo entrenamenduak banakakoak izango dira, eta segurtasuneko gutxieneko distantziari eutsiko zaio.
  • Ez da materiala konpartituko.

Harkaitz Millanek azpimarratu du kirola edo jarduera fisikoa dela aliaturik onena haurrek eta, oro har, herritarrek beren osasuna eta egoera fisikoa hobetzeko, eta pandemiak eragindako egoera ahalik eta modu osasungarrienean gainditzeko.