Goitik behera aldatu digu egunerokoa koronabirusak, eta ia elkarrizketa gai bakarra da hedabideetan zein lagunartean. Gazteek birus berria nolakoa den eta nola eragiten duen ondo ulertzeko artikulu argigarria egin dute Txikipedian.

8-13 urte bitarteko umeentzako entziklopedia bat da Txikipedia, digitala eta euskaraz. Adin-tarte horretako umeentzako moduko lexikoarekin eta sintaxiarekin egina da, eta askotariko gaiak jasotzen ditu. “Koronabirusa birus mota bat da. 1960ko hamarkadan aurkitu zen lehenengo aldiz”, hasten da artikulua.

2019ko koronabirusaren agerpena eta eragina jasotzen duen mapa ere aurkezten du.

Garrantzitsua da gaztetxoak ere koronabirusa zer den ondo ulertzea. Ezinbestekoa da hartu beharreko prebentzio neurriak ondo kontuan hartzeko eta errespetatzeko.

Osakidetzak neska-mutikoen sentsibilizaziorako egindako kartela ere jasotzen dute Txikipediako artikuluan.