Euskal Herriko Ikastolekin elkarlanean egindako unitate didaktikoak aurkeztu ditu AEKk. Guztira, lau unitate dira; adin-tarteka banatuta eta korrika egitearen onomatopeiekin izendatuta daudenak. Xingixango, 3-6 urte bitarteko haurrentzat; Ttipi-ttapa, 6-9 urtekoentzat; Nis-naska, 9-12 urteko
ikasleentzat; eta Tarrapataka, 12-18 urtekoentzat.

Bi motatakoak

Unitate didaktiko horiek bi motatakoak dira; ikastetxeetarako ikasmaterialak Ikastolekin batera sortuak direnak, eta A1etik C1era antolatutako euskaltegirako atazak, AEKren Didaktika Sailak presatu dituenak. Horien helburua “Euskararen erabileran eragitea” eta “euskal kultura transmititzea” da. Horrez gain, euskararen aldeko jarrera “zabaltzea”, bertoko erreferente kulturalak “ezagutaraztea” eta Korrika “iragartzea” ere bada unitate didaktikoekin lortu nahi dena.

Aipatutako materialarekin batera, material berezia ere prestatu dute entzumen zailtasunak dituzten pertsonek erabiltzeko. Material hori sortzeko, Pertsona Gorren Elkarteen Euskal Federazioaren laguntza eta aholkularitza izan du AEKk.

Unitate didaktikoen egileekin elkarrizketa

Horien inguruan jarduteko, elkarrizketa egin du AEKk, Orereta ikastolako irakasle eta ikastetxeetarako unitate didaktikoen egileak diren Iñaki Zapirain eta Jon Alustizarekin. Biek ala biek unitateen berrikuntzak nabarmendu dituzte; esaterako, Korrika Txokoa eta Hurrengora arte! jarduerak. Korrika Txokoan eskoletan gero eta ohikoagoa den zirkulazio autonomoan aritzeko materiala aurkitzen da. Hurrengora arte! jarduera, berriz, Korrika amaitu ondoren gauzatzekoa da. Bertan bizitako esperientziak partekatzea du xedea.

AEKren Didaktika Saileko kide den Amaia Lopez de Luzuriagak ere bere ekarpenak partekatzen ditu bideoan. Euskaltegietarako hiru materialeko sorta prestatu dutela aipatzen du: Badator 24. Korrika!, 24. Korrikaren ibilbidearen jolasa eta Korrika historian. Azken hori dago, hain zuzen, entzumen arazoak dituztenentzat prestatua. Bideo osoa hemen klikatuz ikusi daiteke.

Unitate didaktikoak webgune honetan eskuratu daitezke.