Familian egiteko moduko plana proposatzera gatoz. Antzinako Vasco-Navarro trenbide zaharraren tarte bat bizikletan zein oinez egiteko aukera emango digu, eta uda sasoian bada aukera izango dugu Landan bainua hartzeko.

Gipuzkoaren eta Arabaren arteko mugan dagoen Arlaban mendatean emango diogu hasiera txangoari. Proposamena da Gure Ametsa jatetxe parean dagoen aparkalekutik abiatzea. Bertatik igarotzen da bide berde bihurtuta dagoen eta Leintz Gatzagatik datorren antzinako Vasco-Navarro trenbide zaharraren bidea.

Araba aldera hartuko dugu eta Landara arteko ibilbidean laborantza zelai ugari zeharkatuko ditugu. Ibilbide ia laua da eta hiru bat kilometroko tartea besterik ez da, beraz ume txikiekin ere egiteko egokia.

Une batean errepide bat zeharkatzea tokatuko da. Seinaleak daude bidegurutzea dagoela ohartarazteko. Landako tren geltoki zaharretik hurbil dago eta gure helmugatik gertu.

Bi aukera daude orduan: errepidetik jarraitu eta Etxezuri izeneko jatetxe paretik Landa bainu-gunera egin edo bidegorritik jarraitu eta jatetxe parera iritsitakoan errepidea jaitsi. Jaitsi ostean errepidea zeharkatu behar da. Aparkaleku handi bat dago jatetxe parean eta bide berdeak Gasteizera arte egiteko aukera ematen du.

Bainua Landan

Gure plana bainua hartzea bada Landa hondartzarako bidea hartuko dugu. Mahaiak eta ziburuak dituen berdegune bat aurkituko dugu bidean eta aurrerako bainua hartzeko lekua.

Uribarri Ganboako urtegian dago Landa. Hain zuzen, urtegi horrek hornitzen du edateko urez Vitoria-Gasteiz eta Bilboko zati bat. Urtegiak 40 ha ditu eta 500 metroko hondartza.

Udan, solarium eremuak egoten dira, baita haurrak bainatzeko esparruak, dutxak eta sorospen eta lehen laguntzako zerbitzuak eskaintzeko postuak ere. Barnealdeko hondartza honi bandera urdina eman zaio, inguruaren kalitateagatik eta eskaintzen dituen zerbitzuengatik. Mugikortasun urriko pertsonei bainua hartzea errazteko ekipamendua du eta horrez gain, iturriak, komunak, mahaiak, haurrentzako jolasak eta taberna txiki bat.

Hainbat ibilbide egin daitezke oinez edo bizikletaz urtegiaren inguruan. Denboraz joanda hurbil dagoen Mendixur Parke Ornitologikoa ere bisita daiteke.

Argazkiak: Guraso.eus eta Araba turismo.