Adin batetik aurrerako neska-mutikoekin modu egokian egiteko zeharkaldia da. Zentzu bietan egin daiteke zeharkadia–Larraitzetik abiatuta zein Lizarrustitik abiatuta–. Beste aukera bat da Larraitzetik abiatu, Lizarrustiko aterpetxean lo egin eta biharamunean Larraitzera itzultzea.

Bidean aurkituko ditugu Larrunarri (Txindoki, 1.346 m.) eta Auza-Gaztelu (901 m.). Norberak ikusi behar du tontorrera igo edo ez.

Datuak

  • Distantzia: 11,4 km, joanekoa.
  • Denbora: geldialdirik gabe eta erritmo bizian 3 ordu eta 15 minutu joanekoa
  • Zailtasun maila: ertaina.

Abaltzisketa herrian utzi dugu autoa eta oinez egin dugu Larraitzerainoko bidea, egokitutako bi kilometroko oinezko bidea erabilita. Inguruko hegaztien eta animalien inguruko informazioa ematen dute ibilbide horretan. Oso entretenigarria umeentzako.

Larraitzen sartuko gara Aralar natura parkean. Bide zabala izango dugu hasieran, baina Auza Gaztelurako bidea hartuta estutzen joango da oinezkoentzako mendi bidea bihurtu arte. Eta halaxe etorriko da zeharkaldiko lehen aldapa gogorra.

Auza-Gaztelura igo edo ez erabakitzeko lekuan iturri bat dago ur garbiarekin eta freskoarekin. Aukera ederra da motxilan daramagun ura berritzeko.

Beste igoeratxo bat etorriko da gero eta Aralarko belardi ederretan sartuko gara Lizarrustirako bidean poliki-poliki desnibela galtzen joango garelarik. Eremu zabalak eta artzain bordak aurkituko ditugu bidean, baita ere ganadua (gehien bat behiak edo zaldiak) eta zeruan putreak edo saiak.

Aralar ondo seinaleztatuta dagoen natura parkea da, baina ibilbide asko daude eta gomendioa da egitekoa duguna argi edukitzea.

Altxor natural ugari ditu Aralarrek eta baita ere aurre-historiako pieza ugari; izan ere, ez dira falta trikuharriak, mairu-baratzea. Horietako bat Jentillarri da, 4.000 urte ingurukoa. Aralarren aurkitu zen lehendabizikoa da. Seinaleztatuta daude gehienak.

Goimendietatik behera Lareoko urtegia aurkituko dugu, ur eremu zabala. Ez gaude helmugatk urrun.

Lizarrustira gerturatu ahala gizakiarentzako gehiago egokitutako sendak aurkituko ditugu. Parketxera iritsi baino apur bat lehenago eskalada egiteko eremu ederra dago eta baita ere beste iturri bat. Tunel txiki batetik ere igaro beharko dugu beheranzko bidean. Ez da luzea.

Itzulerako bidea hurrengo eguneko kontua izango da.