Baby Signing bezala ezagutzen den haurrentzako zeinu-hizkuntza, haurrekin komunikazio goiztiarrean aritzeko tresna da. Txikiek jaiotzetik dute komunikatzeko beharra, eta gaur egun, badakigu ez dagoela itxaron beharrik umeek hitz egiten hastera, eurekin komunikatu ahal izateko. Laura Mendia donostiarra, Baby Signing-eko instruktore independentea da eta harekin hitz egin dugu.

Zer da Baby Signing bezala ezagutzen den haurrentzako zeinu-hizkuntza?

Haurrek hitz egin aurretik eurekin komunikatu ahal izateko zeinuak dira. Helburua da zeinu horiek umeei erakustea, eurek dituzten beharrak zeintzuk diren komunikatu ahal izateko.

Noiz komeni da haurrekin zeinu-hizkuntza hori erabiltzen hastea?

Jaiotzen direnetik erabiltzen has zaitezke, baina gomendagarriena da sei hilabetetik aurrera hastea; orduan hasten dira bakarrik esertzen eta mugitzeko gaitasun gehiago hartzen. Lehenengo zeinuekin hasiko lirateke haurraren gurasoak edo zaintzaileak pixkanaka, euren errutinako momentuetan sartzen. Hitz klabeak dira: bainua, esnea, ura, jatea… Eurekin hitz egiten goazen bitartean joango gara gehitzen eta gero eurek imitatu egiten gaituzte, ulertu egiten dute, eta oraindik ezin dutenez hitz egin, euren eskuak erabiltzen dituzte esateko nahi duten hori; jatea nahi dutela, gehiago nahi dutela, ura nahi dutela… Beraz, sei hilabetetik aurrera une egokia da eta ordutik aurrera, eurak ere, poliki-poliki hasiko dira zeinu-hizkuntza erabiltzen, bederatzi hilabeterekin has daitezke dagoeneko horretan.

Umeak ez dauka orduan zertan hitz egiten jakin, zeinuak erabiltzen hasteko.

Hori da asmoa. Eurek ulertzen gaituzte eta gai dira azaltzeko zer nahi duten, baina ez bakarrik negarraren bitartez. Euren eskuekin behar dutena komunikatzeko gai izaten hasten dira.

Eta noiz hasi zinen zu honekin, Laura?

Nik nahiko berandu aurkitu nuen, semeak ia bi urte bete behar zituenean eta hitz egiten hasita zegoen ordurako eta dezente komunikatzen zen. Baina teknika oso polita iruditu zitzaidan eta berarekin erabili nuen batez ere kantuetan eta ipuinetan. Hizkuntzak sustatzeko tresna ere badela uste dut eta orduan hasi nintzen hitzak ingelesez esaten baita ere. Beraz, zeinu bera erabiltzen nuen, baina euskaraz, gaztelaniaz edota ingelesez. Hala, eurek badakite zeinuarekin gauza bera esan nahi dutela.

Zeintzuk dira haurrentzako zeinu-hizkuntzak dituen onurak?

Haur batek behar duen hori komunikatu ahal izatea izugarria da, hasteko, frustrazioak gutxitzen dituelako; bai eurei beste modu batera komunikatzeko aukera daukatelako, eta baita guri ere, negar egiten duenean gu ere kezkatu egiten garelako zer gertatzen zaion jakin nahian. Haurraren konfiantza eta autonomia garatzen ere laguntzen du, izan ere, ikusten badu komunikatzeko gai dela eta eskatzen zaion hori ematen zaiola, haurrarendako onuragarria da.

Batzuek diote haurrekin zeinu-hizkuntzaren bitartez komunikatuz gero, beranduago hasiko dela umea hitz egiten. Hori egia da?

Ez, justu alderantziz da. Hizkuntza ikasten hasteko zubi bat dela esango nuke, hitzak errepikatu egiten dizkiogulako, kontaktu bisuala ere handia delako, eta lotura afektiboa ere indartu egiten dugu berarekin jolasteko eta komunikatzeko era bat ere badelako eta konplizitate handia lortzen da.

Noiz hasi zinen jakintza hori zabaltzen eta tailerrak ematen?

Formazio bat egin nuen eta Baby Signing-eko instruktore independentea egin nintzen. Gero hasi nintzen horri buruzko hitzaldiak eta tailerrak ematen Donostia inguruko haur eskoletan. Nire asmoa zelako familiek ni baino lehenago ezagutzea. Gero pandemiarekin alde batera utzi behar izan nuen, baina berriro itzuli naiz orain eta online formatuan eskainiko dut hurrengo tailerra ekainaren 18an. Parte hartzea nahi dutenek email honetara idatz dezakete nimbeaprendizajedonostia@gmail.com edo baita Instagrameko @amaconsciente-ra idatzita.

Uste duzu pixkanaka geroz eta ezagunagoa egiten ari dela ala oraindik ez dago asko zabalduta?

Niri kasualitatez iritsi zitzaidan horren berri eta nire inguruan ere ez zuten ezagutzen. Egia da geroz eta gehiago entzuten ari dela, eta beste lurralde batzuetan hemen baino hedatuago dago. Amerikako Estatu Batuetan sortu zen duela urte asko eta ez da moda bat.