Gizarte Hezitzaileen Nazioarteko Eguna izan zen urriaren 2an, eta eguna bera aitzakia hartuta, ogibidea ezagutzera eman du Leire Garcia Kalexka elkarteko hezitzaileak. Bere hitzetan, ohikoa da jendeak bestelako lanbide batzuekin nahastea edo zehazki gizarte-hezitzaileek zer egiten duten ez jakitea.

Arrasaten eta bestelako udalerrietan (Bergara, Mutriku, Eibar, Aretxabaleta…) eragiten duen Kalexka elkarteko gizarte-hezitzailea da Leire Garcia. Azaldu duenez, “nahiko berria” da hezitzailearen figura eta uste du oraindik jendeak ez duela gehiegi ezagutzen: “Gure lana pertsonei harreman osasuntsuak izaten eta alderdi pertsonaleko zailtasun eta gabeziak gainditzen laguntzea da”.

Horri lotuta azaldu du esparru askotan eragiten dutela hezitzaileek: adibidez, gizarte zerbitzuetan –oinarrizko udal zerbitzuak edo aldundietakoan– eta baita kalean ere. Gaiei dagokienez ere askotariko arloei heltzen diete, besteak beste, prebentzioa egiteko: drogen kontsumoa, sexualitatea, bullyinga…

Garciak Kalexkaren priektuei ere hitz egin du: “Bazterketa egoeran dauden helduei zuzendutako bidelagun programa batekin ari gara, eta gaztetxoekin ere kalean jarduten dugu esku-hartzea programen bidez”.

Pandemia egoeran, ez dute haien lana eten, eta metodologia aldatu duten arren, lortu dute “harremanak eta komunikazioa mantentzea”. Bukatzeko, Garciak argi utzi nahi izan du, egoerak egoera, gizarte-hezitzaileek “gogoz eta lanean” jarraituko dutela, baina era berean garrantzitsua dela haien lanari garrantzia ematea.