2022tik dago aktibo Eusko Jaurlaritzaren Berdindu! zerbitzua. Anitz Federazioak kudeatzen du; Errepetuz, Aldarte, Gehitu eta Guztiok erakundeek osatzen dute. Bere egitekoa da LGTBIQ+ pertsonei eta haien familiei informazioa eta orientazioa ematea. Horrekin batera, aholkularitza eskaintzen dien zenbat eremutako profesionalei; hala nola, hezkkuntza-eremukoei.

Iaz Berdindu! zerbitzuak 640 kontsulta baino gehiagori eman zien arreta eta 2.400 irakasle baino gehiagori eman zien LGTBIQ+ diskriminazioari aurre egiteko aholkularitza.

Berdindu! Eskolak

Zerbitzuaren atal honek hezkuntza-eremuan eragitea du helburu eta eskola-elkarteak aniztasun afektibo-sexualari eta genero-aniztasunari dagokienez Lehen eta Bigarren Hezkuntzan dauzkan erronka eta desafioei heltzeko beharrari erantzuteko da.

“Berdindu! Eskolak ekimenaren bidez, irakasle, ikasle eta haien familiei orientazioa eta aholkularitza eman nahi zaie sexu- edo/eta genero-aniztasunaren kudeaketan, LGTBIfobiaren kasuak daudenean edo ikasle trans bat prozesu pertsonalean dagoenean. Azken batean, hezkuntza-ingurune inklusiboa eta ekitatiboa sustatu nahi du, pertsona guztien errealitateak eta beharrak kontuan hartzen dituena, haien genero-identitatea eta sexu-orientazioa edozein dela ere”, azaldu du Berdindu! Eskolak ekimeneko teknikari Ander Prolek. “Eskoletan LGTBI pertsonenganako indarkeriak eta bereizkeriak, haien ongizate emozionalean eta akademikoan eragina izateaz gainera, estereotipo kaltegarriak eta aurreiritziak ere betikotzen dituzte. Hori dela eta, irakasle, ikasle eta familiekin lan egiten dugu, bereizkeriarik gabeko hezkuntza-ingurunea sustatzeko”.

Berdindu! zerbitzuaren datuak

Berdindu!-ren bulegoetan, iaz, 648 eskabideri erantzun zien (163 Araban, 265 Bizkaian eta 220 Gipuzkoan) eta, haietatik, %69 lehen kontsultan izan ziren eta %31, segimenduan. Nagusiki, emakumeek erabili zuten zerbitzua (%54); ondoren, gizonek (%32) eta, azkenik, genero desberdineko pertsonek (%3).

Kontsulten tipologiari dagokionez, gehienak sexu- eta/edo genero-identitatearekin lotuta egon ziren (%31), eta, ondoren, asistentzia juridikoarekin (%24) edo hezkuntzarekin (%19).

Berdindu! Eskolak ekimenari dagokionez, prestakuntza-saioak eman ziren 68 ikastetxetan, eta, haietan, 2.413 irakaslek parte hartu zuten; alegia, %16 egin zuen gora parte-hartzeak, 2021aren aldean.