LOMCE legea: Erabakiak hartzeko ikasturtea izan da hurrengoa, mugimendu handikoa

Amaitu da 2013-2014 ikasturtea eta ikastetxe gehienetan hasi dira hurrengoa prestatzen. Azkenaldian hainbeste zeresan eman duen LOMCE legearen eragina zein izango den jakiteko hiru hezkuntza eragile elkartu dituzte Goiena telebistako Tertulia saioan: Ikastolen elkarteko presidente Koldo Tellidu, EHIGEko koordinatzaile Lurdes Imaz eta Gipuzkoako Kristau Eskoletako presidente Juankar Olaeta. Agenda arazoak argudiatuta ez zen Jaurlaritzako ordezkaririk izan Tertulia saioan.

Lasaitasun mezua

Tellituk, Imazek eta Olaetak bat egin dute: lasaitasun mezua da gurasoei bidali behar zaiena. “Argi daukagu LOMCE legearen aplikazioaren aurka gaudela, eta adostasun zabala dago horretan”, esan du Koldo Tellituk. “Baina ez gara inozoak eta jakin badakigu LOMCE legea lege organikoa dela. Herri bezala eta hezkuntza eragile guztien artean adostu behar dugu egoera honi nola aurre egin. Eta instituzioen babesarekin”. Ekimen bateratuak bultzatu behar direla dio Imazek: “LOMCEren kontrako adostasun zabala dagoela uste dugu. Ekimen bateratuak martxan jartzeko ahalegina egin beharko genuke”. Juankar Olaetak ere elkarlanean sinesten du: “LOMCE legea estrategia erreaktiboa da. Elkarlanean egindako proiektuetan sinesten dugu, eta horregatik gaude Heziberri 2020 proiektuan”.

Jaurlaritzaren jarrera

Hiru ordezkariak gustura azaldu dira Jaurlaritza bultzatzen ari den Heziberri 2020 proiektuaren orain arteko ibilbidearekin. Hezkuntza eredu propio baten alde egiten dute hiru eragileek, eta hezkuntza lege propio baten beharra aldarrikatzen dute, batez ere sare kontzertatuko bi kideek. “Heziberrirekin markatuta dagoen ibilbidea egokia dela pentsatzen dugu. Marko pedagogikoa onartuta dago eta orain dekretu kurrikularrak onartu behar dira”, azaldu du Tellituk. “Orduan —urria-azaroa— ikusiko dugu benetan Jaurlaritzaren jarrera zein den. Marko pedagogikoaren logikari jarraituz egingo diren dekretu kurrikularrek talka egingo dute Estatutik datozenekin. Talka hori gertatzen denean ikusiko dugu Eusko Jaurlaritzaren apustua benetan zein den”.
Tellitu, Imaz eta Olaeta ez datoz bat desobedientziarako dei egiten dutenekin. “Samur esaten da, baina ikasleak babestu egin behar ditugu”, esan du Imazek. “Gauza batzuk egiteko adostasunak landu behar dira”. Gehiago esan zuen Olaetak: “Gure bidea egin behar dugu, ez hainbeste LOMCEren kontra. Jaurlaritzak lan, indar eta gogo gehiago ipiniko du norabide jakin baten ikusten badu hezkuntza eragileen babes osoa duela, eta alderantziz”.
Hurrengo ikasturtea, beraz, garrantzitsua izango da.

Tertulia saio osoa hemen.