Lur Etxeberria: “Haurra jaiotzen den une beretik izan behar luke zaintzak partekatua”

Ze arazo ikusten dizkiozu lege proposamenari?

Batez ere, ez duela haurren ongizatea eta interes gorena behar bezala babesten. Besteak beste, zaintza partekatua arau orokor bihurtzea proposatzen du. Uste dut ez dagoela zaintza mota ideal bat guztientzat. Batzuetan izan daiteke partekatua, edo banakakoa edo txandakakoa, eta horrek kasu bakoitza aztertzea, konponbide indibidualizatuak eskatzen ditu.

Gaur egun, zein irizpide hartzen da kontuan zaintza esleitzerakoan?

Kasu bakoitza banaka aztertzen da, eta ekipo psikosozialek begiratzen dute ordura arte haur horren zaintza nola egin den, ze lotura afektibo dituen gurasoekin… Eta erabakia hartzen da egoerari jarraikortasuna eman eta haurrak ahalik eta haustura gutxien izan dezan.

Zaintza eskuratzerako garaian emakumeak abantailak dituela ere entzun ohi da. Egia al da?

Egia da, gaur egun, gehienbat amei ezartzen zaizkiela banakako zaintzak, baina hori banaketa aurreko egoeraren isla da. Izan ere, datuek erakusten dute oraindik amak direla gehienbat haurren zaintzaz arduratzen direnak, eta horren erakusle dugu laneko eszedentziak eta lanaldi murrizketak hartzen dituztenen %90 emakumeak direla. Hala ere, euren abiapuntua da gizonak diskriminatu egiten dituela legeak. Hori asmakizun bat da.

Zaintzari bakarrik ez, beste arlo batzuei ere eragingo die legeak. Zer dio etxebizitzaz?

Orain arte, haurrek daukate familia etxebizitza erabiltzeko eskubidea, baina Kidetzak, kasu hauetan, etxebizitzen likidazio automatikoa proposatzen du. Nola egiten du bat horrek haurraren interesak babestearekin? Etxebizitza likidazioa ondo etor dakioke gurasoetako bati, baina haurrari?

Zein irtenbide proposatuko zenuke?

Legeak haurren interes gorena babestu behar du guztiaren gainetik. Bestalde, banantze-prozesua gatazkatsua bada, lege batek ez dauka gatazka hori gainditzeko gaitasunik. Eta, horregatik, gurasoen erantzunkidetasuna bultzatzeko bestelako lege eta politikak egin behar dira, sakoneko aldaketa sozialak ekarriko dituztenak. Haurrak jaiotzen direnetik zaintza partekatua izatea lortzen bada, gurasoak banantzean ere horrela izaten jarraituko du.

Albistearen eta argazkiaren iturria hemen.