Lur Korta: “Amaren tripan daudenetik hurbil daitezke umeak liburuetara”

‘Bularretik Mintzora’ irakurketa saioetako dinamizatzailea da Lur Korta. Besteak beste Ermuko udal liburutegian gidatzen ditu saioak eta esan beharra dago itxaron zerrenda dagoela berak gidatutako saioetan. Umeek eta gurasoak hartzen dute parte bertan. Drogeten aldizkarian irakurri dugu elkarrizketa.

Nola antolatzen dituzu saioak?
Hasieran beti saiatzen naiz umeak erakartzeko zerbait egiten: kontaketa edo aurkezpen potolo bat. Gero beraien gisara egoten dira. Hamar minututxo, eta azkenik, bukaera on bat ematen saiatzen naiz. Batzuetan hurrengo saiorako zerbait prestatu behar izaten dute.

Zein da dinamizatzailearen lana?
Irakurzaletasuna bultzatzea era dibertigarri eta politean, liburuak aurkeztea, kontatzea, taldeari lanak proposatzea… Umeak eta familiak, klubak irauten duen bitartean, engantxatu eta erakartzea gehienbat.

Zure ustez, zein da adinik egokiena umeak lehen aldiz liburuetara hurbiltzeko?
Liburu edo ipuin egokiak topatu daitezke adin tarte guztietarako. Amaren tripan daudenetik hurreratu daitezke umeak liburuetara, txiki txikitatik, gero ipuinetara hurbiltzea da egokiena, horregatik gure egitasmoaren izena ‘Bularretik mintzora’ da.

Umeekin batera, gurasoak daude zure saioetan. Zein da haien zeregina?
Gurasoek saioez ikasten dute eta, aldi berean, parte hartzen dute era aktiboan: umea gai ez den kasuetan, laguntzen, esaterako.

Zer nolako garrantzia du umeek eskuartean liburua izatea noizbehinka?
Adin horrekin oso garrantzitsua da ipuinen bitartez zenbat gauza landu ditzaketen: irakurzaletasuna, errespetua, beldurrak, jarrera, laguntasuna, eskuzabaltasuna, irudimena…

Komeniko litzateke irakurketa klubean landutakoari etxean jarraipena ematea?
Bai. Izan ere, klubetara etortzen diren gehienek ematen diote jarraipena. Esan nahi dut liburu bat edo zerbait irakurtzen duten momentutik jarraipena ematen ari direla helburuetako batzuei.

Argazkien iturria: Drogeten eta Ermuko udal liburutegia