Ipuin kontalari autodidakta da Maider Alzelai arrasatearra. Ordizian jokatutako Ahozko Narrazioen Lehiaketaren finalera heldu da aurten, eta ez zuen espero. Semea jaio zenean hasi zen ipuinak kontatzen eta milaka kontatu ditu ordutik.

Alzelaik argi du ipuin bat kontatzeko heldu egin behar zaizula, eta gustatu egin behar zaizula. “Sentitu egin behar duzu eta zure egin behar duzu”, dio. Lanketa handia eskatzen duela dio. “Ipuin guztiek dute egitura bat eta egitura hori identifikatu egin behar duzu, eta forma eman. Atzean lanketa handia dago”.

Boluntario moduan hainbat ipuin kontalari saio egin ditu. “Nire semea jaio zenean hasi zen ipuinen munduarekin nire konexioa. Orduan hasi nintzen ipuinak kontatzen eta ikusten zelako indarra duten. Gero antzerki munduan ere hasi nintzen eta lagun batekin talde bat egin genuen ipuin antzeztuak kontatzeko… Ordutik aurrera boluntario moduan milaka ipuin kontatu ditut”.

Ipuinek sortzen dute magnetismoaren buruz galdetuta adierazi du ipuinek aukera handiak eskaintzen dituztela. “Uste dut denei gustatzen zaigula amestea eta gure fantasiei hegoak ipintzea. Ipuinek aukera ematen digute horretarako. Ipuin bat entzuten edo kontatzen dugunean mundu errealean onartuta ez dauden gauza asko daude onartuta. Amestu, sentitzen duzuna esan, pertsonaia batekin identifikatu… Hor dago magia. Bakoitzak hartzen du ipuina bere erara eta niretzat hori oso polita da”.

Alzelaik uste du ipuin guztiek dutela mezu bat baina saihestu egiten du ipuinekin esloganak egitea. “Bakoitzak hartuko du bere mezua. Une horretan entzuleak bizi duen egoeraren arabera seguruenik”.