Euskaraz jardungo duten youtuber eta streamer figurak indartzeko helburuarekin, martxan da Sortu eta play proiektua. Eusko Ikaskuntzaren Asmoz Fundazioak eta Game Erauntsiak abiatu dute, Eusko Jaurlaritzaren Kultura eta Hizkuntza Politika Sailaren laguntzarekin. Game Erauntsia elkarteko komunikazio arduraduna da Maitane Junguitu.

Zer da Sortu eta play?

Euskarazko edukiak sortzeko eta partekatzeko jaio den plataforma bat da. Ikus- entzunezkoen kontsumoa asko aldatu da eta ikusi dugu jendeak kontsumitu egin nahi duela euskaraz. Hori bultzatzeko sortu dugu Sortu eta play. Bi gauza eskaintzen ditugu: alde batetik, edukiak sortzen hasteko baliabideak. Horien artean, zortzi bideo tutorial daude, non oinarrizkoak diren hainbat gako eskaintzen diren. Adibidez, zer-nolako ordenagailua behar den emititzen hasteko, txokotxoa nola antolatu behar den irudi duina aurkezteko, lengoaiari dagokionez pista

batzuk –zer azpimarratu behar den youtuber bazara edo, aldiz, streamer bazara… Beste alde batetik, eskaintzen dugu euskal sortzaile digitalen topagunea. Biltegi bat da, non euskarazko sortzaileek aukera duten edukiak igotzeko eta euskarazko kontsumitzaileek sarbide bat duten euskarazko eduki horietara. Uste dugu garrantzitsua dela jendeak – helduak, nerabeak, haurrak…– jakitea eduki horiek non dauden. Edukiak gaika antolatuta daude. Bideo-jokoen kontsumoa, esaterako, oso garrantzitsua da, baita ere teknologia, umorea…

Euskarazko zenbat sortzaile zaudete Interneten?

Egia esan, pertsona orotarikoak gara oraintxe bertan streame-ak zuzenean egiten ditugunak. 3000 Twitx egitasmoaren inguruan hasi ginenean, uste dut hamar edo hamabi bat ginela, baina ondoren –eta hori zen gure helburuetako bat–, jendea animatu egin zen euskaraz emititzen hastera, eta esango nuke oraintxe bertan bi dozena sortzaile inguru gaudela. Batzuk oraindik fitxatu

egin behar ditugu eta zerrendak luzatu, baina, egia esan, oso pozik gaude hazkunde horrekin, gehienek euskara hutsean egiten dutelako. Badaude ele bitan egiten dutenak –gaztelera eta euskara edo frantsesa eta euskara–.

Sortzaileak badaude. Eta jarraitzaileak?

Nik baietz esango nuke. Streamer batzuek beste batzuek baino jarraitzaile gehiago dituzte, baina stream bakoitzeko dozena bat ikusle izango dira, gutxi gorabehera. Noski, edukien arabera, zuzenekoa hasiko dela abisatu bada… Hor badaude baldintza batzuk, baina, orokorrean, oso pozik gaude, eta erantzun positibo horren erakusle nabarmenena da Twitx plataforman afiliatu kategoria lortu dutela euskara hutsean emititzen duten hainbat kanalek.

Eta zertan ari zarete? Zeri buruzko edukiak dira?

Gehienok bideo-jokoetan aritzen gara, baina badago jendea solasaldiak egiten dituena, umorezko saioak, telebistako programen iruzkinak egiten dituena, gitarra jotzen duena, jendea musikari buruz hitz egitera animatzen duena… Eta gauza friki asko. Esango nuke oraintxe bertan Twitxen eta euskaraz denetarik daukagula.

Zeintzuk dira oztopo nagusiak euskara gehiago ez erabiltzeko?

Euskara erabiltzeak abantailak eta desabantailak ditu. Abantaila nagusia da badakizula gutxi gorabehera zer-nolako publikoa izango duzun, eta ikus-entzuleen lokalizazioa oso zehatza da. Baina, noski, kopurua askoz ere murritzagoa izango da gaztelerarekin, ingelesarekin edo frantsesarekin alderatuz. Badaude kanal batzuk ele bitan egiten direnak, eta gazteleraz egitearen abantaila da Espainiako Estatuaz gain Hego Amerika osoa duzula entzuteko

prest. Oso tentagarria da gaztelera aukeratzea, eta badaude euskal hiztunak izanda ere euskaraz egiten ez duten influencer-ak, youtuber– ak eta streamer-ak. Zergatik? Beste hori aukeratu dutelako. Pena da, baina, neurri batean, ulergarria ere bai maila kuantitatiboari dagokionez. Gure apustua beste bat da. Eremu digitalean ere egin daiteke euskararen alde. Gure eskubide linguistikoei lotuta dagoen zerbait dela uste dugu. Bidezkoa da eduki mota hori ere euskaraz jasotzea. Bilakaera handia izan da mundu digitalean ere, ezta?

Zalantzarik gabe, ikus- entzunezkoen kontsumoa aldatu egin da, eta, batez ere, zuzeneko jarioaren kontsumoa telebista tradizionaletik aldendu egin da. Edukiak, orain, on demand edo nahieran aukeratzen ditugu, eta nahi dugunean ikusteko. Uste dut hori zuzenean lotuta dagoela Youtuber fenomenoarekin. Orain, zuzenekoak ari dira garrantzia hartzen, eta kontraesana ematen du telebistako jariotik aldendu ostean berriro itzultzea horretara, baina Youtubeko baldintzek txarrera egin zuten sortzaileentzat, eta Twitxen aurkitu zuten tokia. Zuzenekoak horra bideratu dira, nahiz eta Youtubek zuzenekoak egiteko aukera ere ematen duen.

Ari zarete zeresana ematen proiektu bat edo bestea dela.

Game Erauntsia elkartearen helburua bideo-jokoak eta euskara uztartzea da. Hala, gure ekintza gehienak online eta digitalki garatzen ditugu. Oraingo egoerarekin, gehiago, gainera. Hamarkada edo hamarkada eta erdi izango da gamer mundua Internetera bideratu zela. Uste dugu garrantzitsua dela eremu digitalean euskara ere indartzea. Are gehiago, ikusita zein garapen izan duten Game-Play-ek, zuzeneko bideo jokoen streaming-ek, kirol elektronikoek, eta abarrek. Horretan ari gara lanean. Uste dugu Twitxen euskaraz emititzeko aukera izatea oso garrantzitsua dela. Pandemia honetatik eta eremu digitalean euskarak indartuta atera beharko lukeela uste dugu.