Mañarian herriko hamar umek erabakiko dute udal aurrekontuaren 10.000 eurorekin zer egin

Beñatek skate parkea proposatu du, Uritzek tirolina bat, beste batzuk igerilekua edo arboletan eginiko etxeak… Mañarian umeen iritzia era zuzenean jakitea erabaki dute, eta martxan dute udal aurrekontuaren 10.000 eurorekin zer egin erabakitzeko partaidetza tailer berezia.

Urriaren 28an egin zuten lehenengo tailerra. Dinamika ezberdinen bitartez umeen ideiak jaso zituzten. Teknikariak ideia guztiak aztertu dituzte eta bigarren tailer batean proposamen horien bideragarritasunaz aritu dira umeekin. Abenduaren 18an aurkeztuko dituzte prozesu osoaren ondorioak.

Mañarian argi dute partaidetza ereduetarako esperientzia interesgarria izan daitekeela honakoa. “Parte hartzen ikasi egin behar da. Demokrazia parte-hartzailearen kulturan hezi gura ditugu umeak”, azaldu du Anboto aldizkarian Mañariko alkate Endika Jaiok. “Umeak garrantzitsu sentitzea gura dugu”.

Urtxintxa elkarteko Aiora Azagirrek dihardu prozesua gidatzen. Duela urte batzuk Francesco Tonucci pedagogo italiarra Euskal Herrira etorri zen, eta gizartean umeen parte-hartzea sustatzeko filosofia zabaldu zuen.

Albistearen eta argazkiaren iturria Anboto.