Golden 5 hezkuntza programa bat da; Maria Jose Lera da programan aitzindaria.

Imagen 9

Argia astekarian luze eta zabal aurkeztu dute Golden 5 hezkuntza programa. Merezi du arreta. Haurraren motibazioa gailurrera eramateko eskolan positibo nabarmentzea proposatzen du, beste batzuen artean. Maria Jose Lera da aitzindarietako bat, Sevillako unibertsitateko doktorea da psikologian.

Programaren oinarriak

Oinarria da ikuspegia aldatzea: “Aldaketak txikiak eta errazak dira, eta lorpenak handiak”, dio Lerak. Egunerokoan teknika txiki batzuk txertatzearekin berehalakoan emaitza ikusgarriak sumatzen direla ziurtatzen du.

Abiapuntua atribuzioen eta espektatiben teoriak dira. Golden 5 programak proposatzen du atribuzio positiboak bakarrik egitea ikasgelan. Prozesu inkontzienteak direla ohartarazten gaituzte; atribuzio positiboek ekartzen dute espektatiben teoriarekin lotutako Pigmalion efektua.

Beste modu batera esanda, ume bakoitzak merezi duela atribuzio positibo bat gelan, eta denen aurrean. Esatea zer ona den halako gaian. Eta horrek berak motibatuko du ikaslea. “Familiak ikuspegi honen partaide egin behar dira”, dio Lerak. “Ikerketek frogatu dute ikasle batekiko espektatiba altuak dituen helduak, oharkabean arreta gehiago eskaintzen diola, azalpenak hobe eta bere modura ematen dizkiola, gehiago animatzen duela, bere akatsak gutxiesten dituela, tematzen dela…”

Duela bi urte hasi ziren Golden 5 programa lantzen Ordizia, Lasarte eta Durangoko Berritzeguneetan. Datorren ikasturtean Irun, Donostia eta Eibarko Berritzeguneak eta Iruñeko Irakasleen Laguntzarako Zentroa hasiko dira lantzen.

Bestelako faktore lagungarriak

* Garrantzitsua da testuingurua zaintzea. Ikasgela polita eta goxoa bada motibatuagoak egongo dira ikasleak.

* Umeek konpetente, autonomo eta ongi harremanduak sentitzeko beharra dute. Bultzatu ditzagun gaitasun horiek.

* Landu dezagun baita ere pentsatzeko era: “Ikasle onena ez da inoiz erortzen ez dena, baizik eta erori ostean zutitzen dena. Gehiagotan zutitzen dena indartsuagoa da. Eskola porrota, zentzu horretan, etsitzea da, erori eta ez altxatzea”. Lerak argi dauka: “Zutitzeko behar duguna da esperientzia positibo asko eta asko izatea norberaren garapenean konfiantza izateko”.

* Emozioak: garatu dezagun emozio positiboek erakarriko dituen testuingurua.

Argiako artikulua osorik hemen.

Argazkiaren iturria hemen.