Gazteen artean indarkeria sexista prebenitzeko sortu zen 2009an Beldur Barik programa, eta aste honetan aurkeztu dute Gasteizen Beldur Barik lehiaketaren 12. edizioa.

Iazko edizioan saria jasotako Kai Nakai artista gasteiztarra izan da, besteak beste, aurkezpen ekitaldian. Programarako sortutako “Nahikoa dela” kantua aurkeztu du bertan.

Gaiaren inguruko hausnarketa eta horrekin loturiko ikus-entzunezkoen sorkuntza bultzatu nahi du lehiaketak. 12 eta 26 urte arteko gazteei zuzenduta dago, eta lan horietan neska-mutilei eskatzen zaie erakusteko ezberdintasun egoerei nola egin aurre Beldur Barik jarrerarekin. Alegia, errespetua, parekidetasuna, askatasuna eta autonomia, elkarkidetza eta indarkeria sexista eta matxistaren bazterketa irmoa adierazten dituzten jarrerak.

Parte-hartzeko kategoriak, berriz, hiru dira: lehen kategorian, 12-13 urte bitarteko parte-hartzaileak izango dira; bigarren kategorian, 14-18 urte bitartekoak; eta hirugarrenean, 19-26 urte bitarteko gazteak. Urtero bezala, lehiaketan bakarka edo taldeka (ikastetxe bat, gela bat, elkarte bat…) parte hartu daiteke. Zortzi sari banatuko dituzte.

Zabalik da lanak aurkezteko epea eta azaroaren 5era arte izango da zabalik.

Lehiaketari buruzko informazioa hemen.