Gipuzkoako Foru Aldundiaren ekimena da TREBA Gurasoak izenekoa. Prestakuntza-ekimen honen helburua da haurren eta nerabeen bizi-kalitatea eta aukerak hobetzea, gurasoak hezkuntza-gaitasunetan prestatuz.
 
Tresna arin eta eraginkor bat izan nahi dute, guraso izateko ezagutza garrantzitsuak transmititzeko lurralde osoan, hainbat eragileren lankidetzarekin. 

Gurasotasun positiboan oinarritutako eskaintza pedagogikoa dela azpimarratzen dute. Harreman afektibo osasuntsu, babesle eta egonkorrak sustatzen dituena; errutinetan eta ohituretan egituratutako hezkuntza-ingurune bat sortuz; estimulazioa, babesa eta ikasteko aukerak eskainiz; haurren eta nerabeen lorpenak eta gaitasunak kontutan hartuz eta haien eguneroko bizitzan laguntza emanaz.
 
Programa honen bidez, lurraldeko udalerrietan hainbat gairi buruzko hitzaldiak eta tailerrak antolatu dira, gurasoei beren seme-alaben hezkuntza-prozesuan laguntzeko.

Hitzaldiak eta tailerrak

Gai bakoitza bi formatutan garatu daiteke: hitzaldiak eta tailerrak.

Hitzaldiek ordu eta erdi inguru iraungo dute, eta tailerrek, berriz, lau ordu, bi saiotan banatuta.

Hitzaldian lantzen dena sakonago garatuko da tailerrean; nolabaiteko jarraipena emanez. Nolanahi ere, jarduera independenteak dira, eta ez da beharrezkoa hitzaldira joatea tailerra egin ahal izateko.

Funtzionamendua

Gipuzkoako Foru Aldundiko Gazteria Zuzendaritzaren ekimena da hori, Gipuzkoako udalekin lankidetzan, haurrak, nerabeak eta gazteak sustatzeko zerbitzuen bitartez.

Jarduerak programatzeko interesa duten udalerrietan egingo dira, gurasoek, guraso elkarteek, ikastetxeek edo herriko beste hezkuntza-eragile batzuek egiten dizkieten eskaerak kontuan hartuz, horiek gaiaren inguruan dituzten kezken, premien edo beharren arabera.

Izen emateak, doakoak

Jarduera bakoitza programatzen den udalerriko haurrak eta gazteak sustatzeko zerbitzuaren bitartez garatuko da eta doakoa izango da.

Jarduera ugari

Hainbat jarduera dituzte antolatuta. Esaterako, Arrasaten hauek eskainiko dira Kulturateko areto nagusian 18:00etan, ondorengo datetan:

  • Otsailak 9: Haur eta nerabeen ongizaterako eta garapen osasuntsu baterako gakoak. Hizlaria: Leyre Cano.
  • Martxoak 2: Haurrak, nerabeak eta hezkidetza etxean. Hizlaria: Nerea Lores.
  • Apirilak 6: Emozioen garrantzia familian. Nola zaindu seme-alaben emozioak. Haur eta nerabeen gurasoentzat. Hizlaria: Donna Apellaniz.
  • Maiatzak 4: Komunikazio ez bortitza. Hizlaria: Nerea Mendizabal.

Hemen duzue katalogoa osorik ikusgai.