Maskulinitatearen lanketa, aitatasuna indartzeko

Maskulinitatea lantzeko tailerra egingo dute, zapatuan, hilak 25, Aretxabaletan, Iñaki Kasares santurtziarraren eskutik. Abiapuntu gisa, egungo testuinguruan gizon izatea zer den izango dute hausnarketa gai, eta bizipenak elkarbanatuko dituzte. Hortik aurrera, datozen saioetarako eztabaida gaiak partaideen interesen arabera hautatuko dituzte.

Kasaresek azaldu duenez, tailerrak gizonezkoentzat soilik izango dira oraingoan, “denok dugu sexismoa oso barneratuta, gehiago edo gutxiago, baina tailerra gizonen aldaketara dago bideratuta” esan du.

Aitatasuna birplanteatuz

Kasaresen ustez, izaera “gizarteko genero rolen arabera” eraikitzen da egun, eta horrek “erabat” baldintzatzen du emozioekiko harremana bizitzeko modua. Berdin eragiten dio aitatasunari ere, “zaintza lanak emakumeei esleitu” izan baitzaizkie. Kasaresen ustez, ordea, hori “kolokan jartzeko garai egokia” da, gizonei ulertaraziz “zaintza lana, gogorra izan arren, aberasgarria eta gozatzeko modukoa” ere badela, eta, noski, “guraso guztien ardura”.

Aitatasuna bizitzeko, baina, eredu perfektu bakar bat ez dagoela defendatzen du Kasaresek, “errealitate desberdin asko” daudelako. Dena den, haren esanetan bada derrigorrez mantendu beharreko ardatz bat: maitasuna. Izan ere,  umeek, besteak beste, arreta, denbora, errespetua eta tratu ona ezinbestekoa dutela uste du santurtziarrak.
Ikastaroaren bidez, orain arteko aitatasun eredu “zurrunetik” aldendu eta eredu “ireki eta malguago bat” sustatu nahi du Kasaresek. Gizonak mundu emozionalera gerturatuz, harreman sendoagoak sortu eta gizarte justuago bat eraikitzeko bideari ekin nahi dio tailerren bidez.